Byłaja kanclerka Hiermanii Anhieła Merkiel zajaviła, što vielmi starałasia, kali ŭznačalvała krainu, nie dapuścić taho, što ciapier adbyvajecca z Ukrainaj, ale nie vinavacić siabie za toje, što nie zmahła hetaha zrabić.
Za svaju šmathadovuju pazicyju adnosna Rasii, jakuju šmat chto ŭ Hiermanii ciapier krytykuje jak zanadta miakkuju, jana prasić prabačeńnia nie stała.
«Ja nie liču, što pavinna skazać: «Heta było niapravilna», — i tamu nie budu prasić prabačeńnia», — skazała jana žurnalistu Der Spiegel.
Adkazvajučy na pytańnie, ci mahła jana zrabić bolš dla praduchileńnia vajny va Ukrainie, Merkiel skazała: «Ja siabie nie vinavaču. Niemahčyma było stvaryć architekturu biaśpieki, jakaja mahła b praduchilić heta».
U toj ža čas eks-kanclerka adchiliła abvinavačvańni pasła Ukrainy ŭ Hiermanii Andreja Mielnika ŭ tym, što jana pravodziła palityku zamireńnia ŭ dačynieńni da Rasii.
«Ja tak nie dumaju. Dypłamatyja, kali jana pacierpić niaŭdaču, nie źjaŭlajecca iłžyvaj», — adznačyła Mierkiel i dadała, što bieź Minskich damoŭlenaściaŭ, na jaje dumku, situacyja va Ukrainie była b jašče bolš krytyčnaj.
Adkazvajučy na pytańnie pra svajo rašeńnie vystupić suprać zajaŭki Ukrainy na siabroŭstva ŭ NATA ŭ 2008 hodzie, jana pryznałasia, što bajałasia, kab heta nie zaachvociła Rasiju škodzić Ukrainie.
Paśla pačatku vajny mnohija stali krytykavać Mierkiel za heta rašeńnie, śćviardžajučy, što Pucin nikoli b nie advažyŭsia pačać vajnu, kali b na Ukrainu raspaŭsiudžvalisia harantyi biaśpieki NATA.
Rasijskaje ŭvarvańnie va Ukrainu 24 lutaha stała pavarotnym momantam, skazała Mierkiel, jana šmat dumaje pra heta i hladzić na toje, što adbyvajecca, z zasmučeńniem.
Mierkiel taksama ŭzhadała svaju sustreču z Pucinym u Sočy ŭ 2007 hodzie. Pa słovach Mierkiel, Pucin tady joj skazaŭ, što raspad SSSR byŭ najvialikšaj hieapalityčnaj katastrofaj, a jana jamu adkazała, što dla jaje, što naradziłasia ŭ Uschodniaj Hiermanii, krach Savieckaha Sajuza staŭ samaj vialikaj udačaj u žyćci.
Tady jana nibyta i zrazumieła, što jany z Pucinym całkam pa-roznamu hladziać na śviet i nie pryjduć da zhody adnosna kaštoŭnaściaŭ demakratyi, raspaviała Mierkiel.
