«Na pieršym miescy z kancertaŭ — «Akijan Elzy». Što piša z-za krataŭ Jahor Marcinovič

Publikujem vytrymki ź listoŭ, atrymanych jašče da pačatku suda.

Pra samyja masavyja kancerty, na jakich byŭ

U nas tut štodnia muzyčnyja ranicy — klipaŭ 10 z 6:00 da 9:00 pakazvajuć. Moža, navat 15, nikoli nie ličyŭ. Biada, što vybar nievialiki (mahčyma, usio, što ź biaspłatnaha dostupu), tamu kožny klip užo viedaješ na pamiać.

Staŭ zhadvać, na jakich samych masavych kancertach ja byŭ. Na pieršym miescy i pa anturažy, i pa masavaści, kaniečnie, «Akijan Elzy» na Majdanie. Ale samaje śmiešnaje, što na druhim — kancert «Sierabro» ŭ Maskvie. U 2012 hodzie ŭ Rasii byli prezidenckija vybary, i ja pajechaŭ u jakaści žurnalista-naziralnika. Nu i pajšoŭ na ahitacyjny kancert miljardera Procharava ŭ SAK «Alimpijski». Akazałasia, što heta kancert «Sierabro» z karotkimi palityčnymi ŭstaŭkami. Na darmovy kancert sabrałasia niamierana małaletak! Nikoli nie čuŭ takoj kolkaści zachoplenaha viskatu adnačasova. Na trecim miescy, vidać, toj samy «Akijan Elzy» — na «Lidbiry» ŭ niejkim hodzie. Ale z Majdanam składana paraŭnać.

Pra biełaruski futboł

Radujusia za biełaruskich futbalistaŭ, jakija ŭ pošukach hrošaj raźbiahajucca pa jeŭrapiejskich čempijanatach. Jabłonski, Klimovič, Paŭlučenka — afihiennyja prykłady. Dakładna lepš za Čyčkana z Ufoj i Łapcieva ź pierdzivam [pieršym dyvizijonam]. Heta ž byli niekali časy, kali ŭ adnoj tolki Rasii čałaviek 20 hulała!

Kožny hod zakidvaŭ sabie ŭ zakładki staronku z [futbolnymi] tablicami Daškieviča [razmova pra Siarhieja Daškieviča, spartyŭnaha žurnalista, pres-sakratara BATE]. A ciapier zastajecca zakidvać hazietu pad nary.

Dla mianie stała niečakanaściu situacyjnaja sacyjałohija — ź dziasiatkaŭ čałaviek, ź jakimi tut siadzieŭ, futbołam cikavilisia čałaviek 6-7, nie bolš. Niama z kim futboł abmiarkoŭvać. Ciapier u kamiery nivodnaha čałavieka, chto b choć braŭ «Presboł» pačytać! Karaciej, ciapier razumieju, što biełaruskim futbołam sapraŭdy mała chto cikavicca. Sto čałaviek na stadyjonie — spraviadlivaja situacyja. Moža, pakaleńnie Lisakovičaŭ i astatnich niešta źmienić.

Pra husty ŭ litaratury

Vielmi lublu, kali składvajecca takaja situacyja, što maje chobi/pryjarytety traplajuć u ahulnyja trendy. Dakumientalna-histaryčnyja knihi z asałodaj čytaju, kolki siabie pamiataju. I ciapier jany narešcie nabrali miehapapularnaść! Taksama nie razumieju, u čym kajf ad kłasičnaj litaratury ŭ 2022 hodzie. Lepš pačytaju sučasnych skandynaŭskich žurnalistaŭ pra isłamskija krainy ci piractva, a nie Remarka ci Drajziera.

Pra nadvorje i padarožžy

Jak u vas usprymajecca sioletniaja zima? Jak na moj hust, dyk adna z samych ciopłych za ŭsio žyćcio. Nikoli ja nastolki pilna nie adsočvaŭ prahnoz nadvorja. Minimum razoŭ dziesiać na dzień bačyš, što abiacajuć. I niejak tak atrymałasia, što nižej za -10 nie apuskałasia ni razu.

Pamiataju tyja błasłaŭlonyja časy, kali praz marazy admianiali ŭroki ŭ škole. Choć ja ŭ tyja časy jašče navat byŭ vydatnikam, mała što prynosiła mnie stolki ščaścia, jak admiena ŭrokaŭ.

Voś čaho ja pakul tak i nie acaniŭ — zimovych padarožžaŭ z choładu ŭ choład. Znachodziacca ž tyja, chto ŭ studzieni-lutym adpraŭlajucca ŭ Šviecyju-Narviehiju. Voś kab u śpioku, dyk afihienna kruta. Hladžu pa suśvietnym prahnozie nadvorja — Havana +27, Rya +29.

Hladžu «Arła i rešku» ŭžo pa trecim kole, prymiarajusia da budučych padarožžaŭ. Spadziajusia, tak i składziecca.