«Jość ludzi, jakija i sami nie razumiejuć, za što mahli patrapić u taki śpis «niadobranadziejnych»
Studentcy fizičnaha fakulteta BDU patelefanavali z kafiedry i pieradali, što jaje i jašče niekalki čałaviek z hrupy zaprašaje ŭ kabiniet namieśnica dekana pa vychavaŭčaj i ideałahičnaj pracy. Pryjechać treba było terminova.
«U kabiniecie namieśnicy dekana mnie skazali, što paklikali ŭ suviazi sa źmienami ŭ administracyjnym, kryminalnym kodeksie i ŭ praviłach unutranaha rasparadku BDU, — raskazała dziaŭčyna «Našaj Nivie». — U dakumiencie było napisana, što ŭdzielničać u masavych mierapryjemstvach, a tym bolš u arhanizacyi nielha, i pra artykuły 23.34 KaAP i 342 Kryminalnaha kodeksa «Arhanizacyja dziejańniaŭ, što hruba parušajuć hramadski paradak».
Dziaŭčyna kaža, što ludziej vyklikali pa peŭnym śpisie, ale niezrazumieła, jakim čynam jaho składali.
«Viedaju, što čatyry čałavieki z majoj hrupy dakładna chadzili. Mianie, naprykład, paklikali, bo ŭ administracyi da hetaha byli da mianie pytańni. Ale jość ludzi, jakija i sami nie razumiejuć, za što mahli patrapić u taki śpis «niadobranadziejnych», — havoryć jana.
«Maja siabroŭka kazała, što pałova hrupy chadziła da namieśnika dekana»
Pa słovach studenta jurydyčnaha fakulteta BDU, u ich taksama pravodziać «razmovy», ale padpisvać nijakija dakumienty nie prymušajuć.
«Naša namieśnica dekana vyklikaje da siabie studentaŭ, jakija byli zaŭvažanyja va ŭdziele ŭ akcyjach, i tych, chto mieŭ administratyŭki, — raskazvaje chłopiec. — Dziela hetaha hatovaja i pasiadzieć na fakultecie paśla zakančeńnia pracoŭnaha dnia.
Abiacała čakać da vaśmi hadzin viečara. U mianie prasili pakazać, ci nie idzie zapis razmovy na telefonie, potym była razmova.
Nabor tezisaŭ prykładna adnolkavy: luty — najbolš ryzykoŭny miesiac, siadzicie i nie vysoŭvajciesia. Usich «kanapnych revalucyjanieraŭ, jakich HUBAZ schapiŭ, adličyli».
Kamuści namiakali, što, kab abialić reputacyju, nie drenna było b schadzić na daterminovaje hałasavańnie na refierendumie. Daroha u advakaturu, na dziaržsłužbu, u pravaachoŭniki dla tych, chto byŭ zaŭvažany u niełajalnaści, zakrytaja. Tak kazała.
Vyklikali vielmi šmat ludziej. Maja siabroŭka kazała, što pałova hrupy da jaje chadziła. Pryčym, nakolki ja viedaju, nie tolki najbolš viadomyja aktyvisty, ale i vypadkovyja studenty. Napeŭna, jana baicca, što kali budzie chto z fakulteta udzielničać dzie-niebudź, to i joj samoj prylacić za heta źvierchu.
Adnamu chłopcu jana skazała, što bačyła jaho na akcyjach, dyk jon adkazaŭ, što bačyŭ jaje na šturmie Kapitolija. Voś takija razmovy».
«Ja što, viedaju, dzie vy tam «zaśviacilisia»? Nam skazali z vami pravieści razmovu»
Na fiłałahičnym fakultecie BDU ŭ studentaŭ, jakija žyvuć u internacie, cikavilisia, dzie jany buduć znachodzicca 27 lutaha padčas refierendumu.
«Usio pačałosia 7 lutaha. U pieršy dzień novaha siemiestra. Z ranicy źjaviŭsia śpis ludziej, jakija pavinny terminova źjavicca ŭ dekanat biez tłumačeńnia pryčyn. Heta, kaniečnie, uźniało chvalu paniki, — kaža adna sa studentak. — Pryčym vyklikali i tych studentaŭ, čyje hrupy ciapier na dystancyjnym navučańni.
Pytalisia, dzie my budziem padčas refieriendumu: doma ci ŭ Minsku. Tym, chto skazaŭ, što doma, zahadali napisać piśmovaje paćviardžeńnie».
«Kali ja pryjšła, namieśnica dekana vielmi radasna mianie sustreła, padziakavała za toje, što pryjšła. Na majo pytańnie, čamu mienavita mianie vyklikali na hetuju razmovu, adkazała: «Ja što, viedaju, dzie vy tam «zaśviacilisia»? Nam skazali z vami pravieści razmovu. Pračytajcie i raśpišyciesia».
U «dakumiencie» było skazana, što ja viedaju, što byvaje za ŭdzieł u niesankcyjanavanych masavych mierapryjemstvach, viedaju administracyjny artykuł 23.34 i hetak dalej. Padpisvać ja admoviłasia. Namieśnica spakojna heta vysłuchała i skazała, što ja maju na heta prava.
Potym skazała, što vyklikaje mianie jašče raz, kab skłaści akt pra toje, što ja admoviłasia ad podpisu».
Čytajcie jašče:
«Usie pad kaŭpakom, śpisy jość». Čamu pierad refierendumam da biełarusaŭ prychodziać siłaviki
U Biełarusi paŭtorna zatrymlivajuć byłych palitviaźniaŭ i «chimikaŭ». Što adbyvajecca?
