Studenty zdavali ispyt Ananič jašče 25 studzienia. Deputatka viała kurs «Mižnarodnaja prablematyka ŭ srodkach masavaj infarmacyi».
Temy biletaŭ hučali ideałahična vyvierana. Voś niekatoryja ź ich: «Kalarovyja revalucyi i hibrydnyja vojny ŭ sučasnaj hieapalityčnaj karcie śvietu», «Adnabakovyja prymusovyja ekanamičnyja sankcyi kalektyŭnaha Zachadu jak instrumient umiašalnictva ŭ spravy suviarennych dziaržaŭ», «Enierhietyčny kryzis u Jeŭropie ŭ kantekście hieapalityčnaha supraćstajańnia», «Pierśpiektyvy intehracyi Biełarusi i Rasii (Sajuznaja dziaržava) va ŭmovach sankcyjonnaha cisku kalektyŭnaha Zachadu».
Studentam prapanoŭvałasia taksama parazvažać pra mnahaviektarnaść źniešniaj palityki Biełarusi pa materyjałach Usiebiełaruskaha narodnaha schodu.
«Spadziajusia, kali nie ŭsim, to dobraj piaciorcy siońniašnich ekzamienavanych, dapamoža adbycca majo nastajacielnaje — pamiatajcie, jak słova adabjecca i što žurnalistyka — prafiesija dziaržaŭnaja. Sens jaje — słužeńnie svajoj krainie i svajmu narodu», — napisała Ananič paśla ispytu ŭ svaim instahramie.
Svaje varyjanty adkazaŭ na bilety pad dopisam pakinuć nielha. Post zakryty dla kamientavańnia.
Studenty žurfaka: «Adna z cytat: «Abjektyŭnaja žurnalistyka — taja, što abjektyŭnaja z boku dziaržavy»
Studenty žurfaka BDU raskazali, jak prachodziŭ ekzamien u eks-ministarki infarmacyi.
«Ździvilisia, kali ŭbačyli bilety, ale paśla jaje lekcyj heta było čakana. Jana na kožnaj pary pravodziła prapahandu, pa situacyi ź mihrantami, Kanstytucyjaj i padziejach, što prachodzili na praciahu siemiestra, — raskazvaje studentka. — Adna z cytat: «Abjektyŭnaja žurnalistyka — taja, što abjektyŭnaja z boku dziaržavy». Pra «Našu Nivu», darečy, kazała, maŭlaŭ, vy ž razumiejecie, što ciapierašniaje vydańnie nijakaha dačynieńnia nie maje da «staroj».
Fota sa staronki ŭ Fejsbuku deputatki
Taksama havaryła: «Vy ž razumiejecie, što my nie ź Jeŭropaj kanfliktujem, a praź Jeŭropu ZŠA sprabuje nami kiravać». A pra Rasiju: «My dakładna pavinny viedać, dzie nam ciopła, a dzie nam choładna».
Pra apazicyju mierkavała: «Hetyja źbiehłyja nie apazicyja — apazicyja pavinna znachodzicca ŭ krainie, a heta tak». Havaryła, što ad sankcyjaŭ pacierpić Jeŭropa, a nie Biełaruś.
Lekcyi było ahidna słuchać, paśla pieršaha sieansu prapahandy ŭ mianie ŭvieś dzień baleła hałava, tamu što ŭ ćviarozym rozumie ciažka ŭsprymać hetuju infarmacyju. Ale jana ščyra ŭ jaje vieryć.
Na ekzamienie adkazvali pa biletach, ale bolš jana havaryła, čym my. Asabliva pa temach, jakija jaje tryvožyli, pra kalarovyja revalucyi, naprykład, ci pra Ukrainu.
Chłopcu z Kijeva jana zadała pytańnie: «Vy ž razumiejecie chto kiruje vami?». Jon skazaŭ, što nichto nie kiruje, jana i pačała raskazvać.
Havaryła, što Ukrainaj kiruje kalektyŭny zachad i, viadoma ž, Amieryka. Na ekzamienie ŭsim pastaviła rejtynhavuju adznaku. Cikava, što ŭ jaje ŭ śpisie była kałonka «pazicyja». Što jana tudy pisała — nie viedaju».
Jašče adna studentka Lilii Ananič kaža, što bilety jany bačyli zahadzia i pytańniam na ekzamienie nie asabliva ździvilisia.
«Ananič kazała čytać naviny, kab być u kursie padziejaŭ, što ŭ śviecie adbyvajecca, — raskazvaje dziaŭčyna. — Kaniečnie, tolki dziaržaŭnyja miedyja. Zdali, darečy, usie. Ale my čakali i viedali, što buduć takija bilety. Bo na kožnaj pary abmiarkoŭvali naviny, čytała lekcyi, jak u nas usio vydatna.
Na parach treba było joj raskazvać naviny, jakija byli na tydni. Kali ŭ kahości mierkavańnie adroźnivałasia ad jaje, to rezka pierabivała, kazała, što heta nie tak, i praciahvała hnuć svajo. Luboje inšaje mierkavańnie jana spyniała. Usia para — heta byŭ jaje manałoh. Nie było takoha, što padčas lekcyi jana ŭ kahości pytałasia mierkavańnie. Siadzić i sama sabie havoryć nibyta. Nichto jaje nie słuchaŭ, usie zajmalisia svaimi spravami.
Dopusk da ispytu — napisać refierat. Temy prykładna takija ž, jak i bilety na ispyt. Usie kapiravali hetuju «dziaržaŭnuju» infarmacyju i adkazvali. Karaciej, zdali i zabylisia. Jana nam ničoha nie dała i my ničoha nie vynieśli adpaviedna».
Čytajcie taksama:
Deputatka Ananič apranuła ŭsiu siamju ŭ mierč ad Łukašenki FOTAFAKT
