Śviatłana Paramyhina
Fota pressball.by.
Bijatłanistka Śviatłana Paramyhina pryniesła Biełarusi adzin ź pieršych alimpijskich miedaloŭ u historyi krainy. Padčas Hulniaŭ-1994 u Lilechamiery ŭradženka Jekacierynburha pryjšła druhoj u spryncie na 7,5 kiłamietra.
Paramyhina skončyła karjeru ŭ 2001 hodzie, kali joj było 36 hadoŭ. Eks-bijatłanistka pajšła ŭ spartovuju žurnalistyku — pracavała ŭ haziecie «Presboł» i kamientataram na telebačańni. A ŭ 2010-ch pajšła ŭ spartovyja čynoŭnicy — uznačaliła Biełaruski sajuz kańkabiežcaŭ.
Pra jaje kamientatarstva jość nieadnaznačnyja vodhuki, ale ž Śviatłanu ličać cudoŭnaj spartovaj žurnalistkaj-rasśledavalnicaj. Taksama niekalki hod tamu jana była redaktarkaj prajekta cardio.today.
Ale apošnija hady pra jaje ničoha nie čuvać. Ciapier Śviatłanie Paramyhinaj 56. Jana nie vychodzić na suviaź z byłymi kalehami i nie adkazvaje na paviedamleńni ŭ mesendžarach. Dzie ciapier byłaja tytułavanaja spartsmienka i čym zajmajecca, nieviadoma.
Dźmitryj Daščynski
Fota teenage.by.
Moža zdavacca, što chakiej — hałoŭny dla našaj krainy zimovy vid sportu. Ale ž na zimovych Alimpijadach bolšaść miedaloŭ biełarusam prynosiać inšyja vidy, frystajł i bijatłon.
Dźmitryj Daščynski — pieršaja jarkaja zorka biełaruskaha frystajła. Jon ŭdzielnik piaci Alimpijad, a ź dźviuch ź ich pryvodziŭ dachaty miedali (bronza ŭ Nahana-98 i srebra ŭ Turynie-06).
Na apošniaj dla siabie Alimpijadzie ŭ Sočy Daščynski zaniaŭ vośmaje miesca, paśla čaho vyrašyŭ skončyć karjeru. Ale ž doŭha biez pracy frystajlist nie siadzieŭ i chutka staŭ trenieram biełaruskaj zbornaj pa hetym vidzie sportu.
Fota: akaŭnt Dźmitryja Daščynskaha ŭ Instagram
Spačatku Daščynski zajmaŭsia reziervam zbornaj (junijorami i moładździu), ale paźniej pačaŭ dapamahać hałoŭnamu trenieru.
Ciapier, padčas Hulniaŭ u Piekinie, 44-hadovy Daščynski razam ź inšym śpiecyjalistam Michaiłam Kurłovičam adkazvaje za trenirovačny praces alimpijcaŭ.
Sprava ŭ tym, što praz palityčny cisk biełaruskija frystajlisty zastalisia biez hałoŭnaha treniera nacyjanałki.
Zornaha Mikałaja Kazieku, što byŭ sa zbornaj z Alimpijady-98 u Nahana (pieršy miedal Daščynskaha), adchilili ad pracy z kamandaj paśla taho, jak toj padpisaŭ adkryty list spartoŭcaŭ za sumlennyja vybary.
Alaksiej Hryšyn
Fota BIEŁTA.
Jak i Daščynski, hety frystajlist udzielničaŭ u piaci Alimpijadach. Jaho bronza ŭ Sołt-Łejk-Sici ŭ 2002 akazałasia adzinym biełaruskim miedalom na tych hulniach. Praz vosiem hod u Vankuviery Hryšyn daciahnuŭsia da zołata. Miž inšym, pieršaha ŭ historyi biełaruskaha ŭdziełu ŭ zimovych Alimpijadach.
Paśla Hulniaŭ u Sočy ŭ 2014-m Hryšyn vyrašyŭ syści sa sportu. Ale nie pajšoŭ u trenierstva, a vybraŭ dla siabie zusim inšy šlach — biznes.
Pa słovach Alaksieja, kampaniju «AlimpikHołd» jon adkryŭ jašče ŭ 2010-m hodzie paśla hulniaŭ u Vankuviery. Spačatku jana zajmałasia suvienirnaj pradukcyjaj. Adnak nie pajšło.
Potym jon źmianiŭ śfieru i staŭ zajmacca budaŭnictvam. Ale i tut sutyknuŭsia z prablemami. U kampanii Hryšyna byli vialikija ciažkaści z uźviadzieńniem šmatpaviarchovika ŭ «Lebiadzinym», u dadatak chapała iskaŭ ad kampanij, što ŭkładvalisia ŭ budaŭnictva doma. Ahulnyja patrabavańni kredytoraŭ pieravyšali 20 miljonaŭ rubloŭ u ekvivalencie.
Tamu ŭ 2018 hodzie sud pačaŭ konkursnuju vytvorčaść u dačynieńni da «AlimpikHołd». Pa stanie na biahučy hod kampanija była ŭ śpisie tych, što znachodziacca ŭ pracedury bankructva. Čym dalej budzie zajmacca 42-hadovy Hryšyn, pakul nieviadoma.
Cikava, što miedyja pra frystajlista ŭspomnili ŭ 2018 hodzie, kali toj bałaciravaŭsia ŭ deputaty Minharsavieta. U toj čas žurnalisty datelefanavalisia da Hryšyna, kab pačuć, čamu jon idzie na takuju važnuju pasadu. Ale ŭ adkaz pačuli dziŭnaje: «Jakaja vam roźnica, čamu ja idu ŭ deputaty?»
U 2019 hodzie Hryšyn znoŭ źjaviŭsia ŭ ŚMI. Jon vyrašyŭ pradać svaje alimpijskija miedali na aŭkcyjonie, kab vyručyć hrošy na apieracyju dla blizkaha čałavieka.
Ała Cupier
Fota BIEŁTA.
Adna z samych viadomych biełaruskich frystajlistak, čempijonka Alimpijady-2014 u Sočy. Upieršyniu na Hulni Cupier, na toj čas ukrainskaja spartsmienka, pryjechała jašče ŭ 1998 hodzie. Paźniej pierajšła ŭ biełaruskuju zbornuju, za jakuju vystupiła jašče na piaci Alimpijadach.
Cupier źbirałasia i na Hulni ŭ Piekinie, ale ž nie dazvoliła zdaroŭje. U 2021 hodzie jana pieraniesła apieracyju na achiłavym suchažylli i nie zdoleła adnavicca dastatkova chutka.
Miž inšym, frystajlistka dahetul pakazvała dobryja vyniki. Naprykład, u studzieni 2021 hoda Cupier uziała srebra adnaho z etapaŭ Kubka śvietu pa frystajle.
Fota: akaŭnt Ały Cupier u Instagram.
Čym jašče zajmajecca 42-hadovaja spartsmienka? Jak kaža sama Cupier, u pieršuju čarhu jana mama — u čempijonki dvoje dziaciej. Heta adna z pryčyn, što matyvavali spartsmienku ŭdzielničać u stvareńni dziciačaha spartyŭnaha centra «Tryčatyry». Tam ich vučać pierš za ŭsio roznym vidam himnastyki — i, kaniečnie, frystajłu.
Nielha nie zhadać jašče adzin fakt. Ałła Cupier, jak i inšyja členy zbornaj pa frystajle, padpisała ŭ 2020 hodzie list da biełaruskaha ministra sportu ŭ padtrymku treniera Mikałaja Kazieki, adchilenaha ad pracy z kamandaj za svaju hramadzianskuju pazicyju.
Hanna Huśkova
Fota pressball.by.
Uładalnica zołata ŭ Pchiončchanie-2018 Hanna Huśkova ciapier znoŭ na Hulniach.
Bukmiekiery spadziajucca na jaje bolš, čym na astatnich biełaruskich frystajlistak: 29-hadovaj Huśkovaj praročać šostaje miesca, a kaeficyjent na jaje zołata — 13.
Fota: akaŭnt Hanny Huśkovaj u Instagram.
Nastupny siezon paśla Pchiončchana Hanna prapuściła — adnaŭlałasia ad traŭmy kalena. U lutym 2020 hoda, na apošnim pierad pandemijaj etapie Kubka śvietu pa frystajle, Huśkova ŭziała zołata i adznačyła hetkim čynam svajo viartańnie ŭ sport.
Admietna, što Huśkova nie chavaje svaju hramadzianskuju pazicyju. Letam 2020 hoda dziaŭčyna padpisała adkryty list biełaruskich spartoŭcaŭ za sumlennyja vybary.
A trochi paźniej, kali pad cisk trapiŭ trenier Mikałaj Kazieka, pastaviła podpis i pad listom u jaho padtrymku.
Darja Domračava
Hetaje i nastupnaje fota: akaŭnt Darji Domračavaj u Instagram.
Toj čałaviek, bieź jakoha nie ŭjavić sabie hety śpis. U jaje bahažy bronza Vankuviera-2010, try zołaty Sočy-2014, zołata Pchiončchana-2018 (u składzie žanočaj estafiety). Fanaty nazyvali jaje «naša Daša», a Łukašenka ŭručyŭ tytuł Hieroj Biełarusi.
U 2018 hodzie Domračava abviaściła pra zaviaršeńnie spartovaj karjery. Da hetaha jana vyjšła zamuž za suśvietna viadomaha narviežskaha bijatłanista Ule-Ejnara Bjorndalena i naradziła dačku Ksieniju. Hod čempijonka adpačyvała i zajmałasia vychavańniem dziciaci, a ŭ vieraśni 2019-ha narešcie pajšła na novuju pracu.
Domračava pačała treniravać žanočuju zbornuju Kitaja pa bijatłonie, a jaje muž uznačaliŭ anałahičnuju mužčynskuju kamandu.
Letam 2020 hoda ad Domračavaj, jak ad Hieroja Biełarusi, šmat chto čakaŭ niejkaj reakcyi na padziei ŭ krainie. U žniŭni taho hoda bijatłanistka apublikavała ŭ Instagram zaklik «da ŭsich, ad kaho heta zaležyć», z prośbaj spynić hvałt, ale ž nie ŭdakładniła, da kaho kankretna hety zaklik.
Praz paru miesiacaŭ, u kastryčniku, brata spartsmienki Mikitu Domračava zatrymali i źbili biełaruskija siłaviki. Tady Darja znoŭ źviarnułasia ŭ sacsietkach da temy hvałtu, ale ž znoŭ nie skazała pra toje, chto ž kankretna ŭ Biełarusi karystajecca takim srodkam vyrašeńnia prablem.
Napiaredadni Alimpijady ŭ Piekinie Darja šmat vykazvałasia ŭ miedyja ab pracy ŭ Kitai. Napeŭna, lepiej za ŭsio jaje ŭražańni padsumoŭvajuć takija słovy: «Alimpijski miedal — meta, jakoj vielmi ciažka dasiahnuć, ale my budziem praciahvać za jaje zmahacca».
Tym nie mienš, pakul kitajski bijatłon nie raduje alimpijskimi vynikami. Na źmiašanaj estafiecie ŭ Piekinie zbornaja Padniabiesnaj zaniała 15-je miesca. U indyvidualnaj honcy najlepšy žanočy vynik — 35-je miesca, samy vysoki mužčynski vynik — 39-je miesca (najlepšy vynik bijatłanista Jana SinJUania ŭ karjery).
Nadzieja Skardzina
Fota noc.by.
Nadzieja Skardzina pryniesła Biełarusi dva alimpijskija miedali — bronzu Sočy-2014 i zołata Pchiončchana-2018 (u składzie žanočaj estafiety).
Paśla čempijonskaj dla siabie Alimpijady ŭ Karei Skardzina, jak i Domračava, skončyła prafiesijnuju karjeru ŭ bijatłonie.
U žniŭni 2019 hoda Nadzieja vyjšła zamuž za šviejcarskaha bijatłanista Marcina Jehiera. A ŭ listapadzie taho ž hoda naradziła syna Daniiła.
Paśla hetaha siamja pierajechała na radzimu Jehiera, u šviejcarskuju viosku Fiecis.
Fota: akaŭnt Nadziei Skardzina ŭ Instagram.
Spartsmienka rodam z Rasii, ale ž nazyvaje siabie biełaruskaj. U 2020 hodzie Nadzieja Skardzina stała tysiačnaj padpisantkaj lista spartoŭcaŭ za sumlennyja vybary.
Paśla vybaraŭ-2020 Skardzina vykazvałasia ŭ padtrymku biełaruskich pratestaŭ: «Dla mianie vidavočna, što našy ludzi nie žadajuć hvałtu. Jany vychodziać vyklučna na mirnyja pratesty — pra heta kažuć maje znajomyja i siabry. Ludzi prosta patrabujuć spraviadlivaści. Jany nie robiać ničoha drennaha, jany prosta vychodziać na vulicu — a suprać ich AMAP i vajskoŭcy».
Miarkujučy pa sacsietkach, Nadzieja taksama nie zabyvaje pra sport. Jana čas ad času ŭdzielničaje ŭ amatarskich łyžnych honkach.
Fota: akaŭnt Nadziei Skardzina ŭ Instagram.
Čytajcie jašče:
Padpisaŭ list za Łukašenku i trapiŭ u składanuju historyju kachańnia. Što viadoma pra pieršaha biełaruskaha miedalista Piekina
Honar za frystajł i bijatłon dy hulni pad BČB. Jak raniej Biełaruś vystupała na zimovych Alimpijadach i čaho čakać ciapier?
