Kaciaryna «Ejfaryja» prafiesijna zajmajecca makijažam, jana viadomy vizažyst, supracoŭničaje jak ź biełaruskimi fatohrafami, tak i z zamiežnikami.
Dziaŭčyna viadzie piersanalny błoh na Jutubie, kantent taksama pryśviečany vizažu. Pa biełaruskich mierkach prahlady prystojnyja, samyja papularnyja roliki nabirajuć pad sotniu tysiač prahladaŭ, časam i bolš (topavaje videa prahladzieli až 300 tysiač razoŭ).
Ahułam ža Kaciaryna zarablaje makijažam (ad 70 da 100 dalaraŭ), viadzie afłajn- i anłajn-kursy pa vizažy i pravilnym karystańni kaśmietykaj.
«U Minsku vielmi vialikaja kankurencyja siarod vizažystaŭ — šmat dobrych majstroŭ na luby hust. Šmatlikija dziaŭčyny dumajuć, što heta lohki chleb. Farbavać siabie, pamadka, pendźliki:).
Nasamreč heta ciažka. Kab pačać zarablać u hetaj śfiery, treba šmat pracavać i časta biaspłatna. I heta vialikija traty. Ja maju znosiny z mnohimi cyrulnikami, jakija sprabavali paralelna stać vizažystami, ale ŭsie admovilisia ad hetaj idei, — raskazvała Kaciaryna. — U vizažysta pastajannyja vydatki: tanalnyja srodki, prajmier i t. d.
Asabliva šmat traciš, kali pracuješ z darahoj kaśmietykaj, naprykład z Armani, by Terry, D & G, Ellis Faas, Tom Ford. Heta šalonyja hrošy, a kaśmietyka zakančvajecca vielmi chutka, asabliva kali ty paralelna viadzieš kursy.
Tamu ja nie razumieju tych, chto ličyć, što heta lohki chleb. Pasprabavać, viadoma, varta. Ale ŭ nas nie nastolki vialikaja kraina, kab było tak šmat vizažystaŭ. Zdymak i kamiercyi mała, a achvotnych paŭdzielničać — vielmi šmat».
Kaciaryna viadzie typovy instahram: kaśmietyka, darahija rečy, nadźmutyja vusny, hullivyja pozy, padarožžy.
Zdavałasia b, šarahovaja sučasnaja błohierka. I tut raptam Interpał.
U bazie Interpała Kaciarynu šukaje Polšča. Paviedamlajecca, što dziaŭčyna moža być datyčnaja da admyvańnia dachodaŭ ad złačynnaj dziejnaści i ŭdziełu ŭ złačynnaj arhanizacyi.
Čyrvonaja paznaka la fota aznačaje, što Ryškievič abviaścili ŭ mižnarodny vyšuk. Heta praduhledžvaje vyšuk, zatrymańnie i aryšt z metaj ekstradycyi. To-bok pry sprobie pierasiekčy miežy Jeŭrasajuza Kaciarynu mohuć zatrymać navat niepasredna na miažy.
Taksama vyšuk «pa čyrvonaj kartcy» śviedčyć, što złačynstvy, u jakich padazrajuć čałavieka, praduhledžvajuć pakarańnie, bolšaje za 2 hady pazbaŭleńnia voli.
Na momant publikacyi Kaciaryna spakojna adpačyvała ŭ Dubai. «Naša Niva» źviazałasia ź joju pa kamientar, Kaciaryna adkazała koratka: «Ja ŭ kursie, heta nijak nie źviazana z palitykaj u RB, moj advakat zajmajecca pytańniem».
Čakajecca, što kali kraina supracoŭničaje ź Interpałam, to jana musić zrabić usio mahčymaje dla zatrymańnia čałavieka, jakoha šukajuć «pa čyrvonaj kartcy», kali zaŭvažyć hetaha čałavieka na svajoj terytoryi.
Dyk što ciapier budzie ź vizažystkaj i błohierkaj? Kali Kaciaryna vierniecca ŭ Biełaruś, to jaje zatrymajuć i addaduć polskaj palicyi? Zusim nie fakt, chutčej — naadvarot.
U Biełarusi isnuje biuro Interpała, ale ŭ vydačy abvieščanych u mižnarodny vyšuk biełarusy ŭžo nieadnarazova admaŭlali. Praŭda, heta byli palityčnyja momanty: tak, naprykład, Biełaruś nie zachacieła vydavać paplečnika Janukoviča bankira Viktara Bratko i brata byłoha prezidenta Kyrhyzstana Bakijeva.
Taksama paharšeńnie stasunkaŭ Biełarusi z Polščaj moža pryvieści da taho, što patrabavańni ci zapyt palakaŭ buduć prosta praihnaravanyja.