Masavaja revakcynacyja ad karanavirusnaj infiekcyi COVID-19 ciapier nie źjaŭlajecca nieabchodnaj i, naadvarot, moža pryvieści da pabočnych efiektaŭ. Da takoj vysnovy pryjšła mižnarodnaja hrupa navukoŭcaŭ, siarod jakich hałoŭny navukovy supracoŭnik Suśvietnaj arhanizacyi achovy zdaroŭja (SAAZ) Sumja Svaminatan i vykanaŭčy dyrektar prahramy SAAZ pa nadzvyčajnych situacyjach u halinie achovy zdaroŭja Majkł Rajan. Ich artykuł apublikavany ŭ časopisie The Lancet.
Na dumku aŭtaraŭ daśledavańnia, rańniaja revakcynacyja ad karanavirusa moža pryvieści da pabočnych efiektaŭ. Ekśpierty padkreślivajuć, što heta tyčycca jak mRNK-vakcyn, tak i preparataŭ na asnovie adenavirusa.
U dakładzie havorycca, što kali bustarnyja dozy buduć uvodzicca ŭ arhanizm zanadta rana ci zanadta časta, to heta moža vyklikać u pacyjenta mijakardyt (u dadzienym vypadku havorka idzie ab uviadzieńni mRNK-vakcyn, to-bok preparataŭ ad kampanij Pfizer i Moderna), a taksama sindrom Hijena-Bare (tut majucca na ŭvazie vakcyny na asnovie adenavirusa, uklučajučy «Sputnik V» i preparat ad AstraZeneca).
Navukoŭcy śćviardžajuć, što novaja chvala COVID-19, vyklikanaja delta-štamam, pahoršyła suśvietny kryzis hramadskaj achovy zdaroŭja i prymusiła ŭrady bolšaści dziaržaŭ zadumacca ab nieabchodnaści bustarnych doz dla vakcynavanaha nasielnictva.
«Choć ideja dalejšaha skaračeńnia kolkaści vypadkaŭ COVID-19 šlacham pavyšeńnia imunitetu ŭ vakcynavanych ludziej i pryvabnaja, luboje rašeńnie ab hetym pavinna hruntavacca na faktyčnych danych i ŭličvać pieravahi i ryzyki dla asobnych asob i hramadstva», — kažuć ekśpierty.
Pa ich słovach, zajavy ab tym, što ŭ najbližejšy čas moža spatrebicca bustarnaja vakcynacyja, kali jany nie buduć paćvierdžany nadziejnymi danymi i analizam, mohuć admoŭna paŭpłyvać na davier da vakcyn i padarvać namahańni pieršasnaj vakcynacyi.
Aŭtary daśledavańnia dadajuć, što revakcynacyja moža spatrebicca ludziam z asłablenym imunitetam, a taksama tym, u kaho nie sfarmavałasia abarona paśla asnoŭnaj vakcynacyi. Razam z tym jany padkreślivajuć, što kali ŭ čałavieka nie sfarmavaŭsia imunitet paśla pieršaj pryščepki, to efiektu ad bustaru taksama moža nie paŭstać.
