Havorka idzie pra dva zapisy. Na pieršym Karajeŭ vystupaje pierad bajcami Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj, jakoje stajała ŭ pieršych šerahach pieraśledu prychilnikaŭ pieramien.
Karajeŭ na zapisie pryznaje, što siłaviki nie byli hatovyja da pratestaŭ takoha maštabu. Raźličvali, što niezadavolenych budzie stolki ž, kolki paśla vybaraŭ u 2010-m.
«U vas na ŭsio chapiła siłaŭ, — kazaŭ ministr. — U pieršyja čatyry dni «hrupy ataki», pra jakija ŭžo viedaje prezident, razam z AMAP i ŭnutranymi vojskami ŭratavali krainu».
Biełaruski narod Karajeŭ na tym zapisie nazyvaŭ «tupavatym», kazaŭ, što ludzi «nie bačać dalej za piać mietraŭ ad nosu» i naohuł heta «tłustyja abyvacieli». Siłaviki ž, na jaho dumku, «hasudaravy ludzi».
Pry hetym u raniejšych intervju Karajeŭ z kryŭdaj adznačaŭ, što jamu nieadnarazova davodziłasia čuć abrazy ŭ svoj adras, źviazanyja ź jahonaj nacyjanalnaściu, maŭlaŭ, apanienty pierachodziać usie miežy, pryhadvajuć jamu, što jon asiecin.
Na druhim zapisie, dzie pavodle ekśpiertaŭ taksama zafiksavany hołas Juryja Karajeva, toj prachodzicca pa Siarhieju Cichanoŭskim: «Niama na jaho artykuła — treba prydumać i pasadzić jaho nadoŭha. Chaj tam siadzić! Chaj zdochnie tam!»
Ekśpiertyzu zamoviła pravaabarončaja arhanizacyja «Pravavaja inicyjatyva». Zapisy vyvučała śpiecyjalist niezaležnaj ekśpiertyzy AAT «HłavEkśpiert». Vysnova — hołas na aŭdyjozapisach adzin i toj ža, što i ŭ aryhinalnych intervju Karajeva na dziaržaŭnym telebačańni. Prykmietaŭ mantažu na aŭdyjozapisach niama.
Nahadajem, u kastryčniku 2020 hoda, kali ŭ Biełarusi jašče praciahvalisia masavyja pratesty, Karajeva adpravili ŭ adstaŭku i panizili — jon staŭ pamočnikam Łukašenki pa Hrodzienskaj vobłaści. Jahonaje miesca ŭ ministerstvie zaniaŭ były načalnik minskaj milicyi Ivan Kubrakoŭ, jaki taksama źviazany z razhonam demanstrantaŭ.
