Znajšli redkuju ptušku Andrej Baradzin, Alaksandra Kudzinava, Siarhiej Anochin, Darja Urucina, Kaciaryna i Alaksandr Varabjovy. Vyznačyŭ vid Andrej Baradzin, kaardynatar Kłuba200 APB.
Daviedaŭšysia, što na rybhasie «Vołma» spuścili vadu na 6-j sažałcy, my vyrašyli źjeździć tudy, — raskazaŭ Andrej sajtu «Ptuški štodnia». — Maje spadarožniki chacieli tam ubačyć kryčku-čehravu, mianie ž bolš cikavili kuliki. Ich było niašmat, pryjemna ŭraziła tolki čarodka z 11 vialikich kulonaŭ. Na dnie sažałki siadzieli i arłany-biełachvosty, a siarod ich hetaja dziŭnavataja ptuška. Ja jašče tam pažartavaŭ nakont arłana-daŭhachvosta, tamu što zavočna byŭ znajomy z hetym vidam (spadziavaŭsia ŭbačyć jaho padčas padarožža ŭ Kazachstanie, ale tady nie atrymałasia). Kali ž arłan uźlacieŭ, Alaksandra zmahła zrabić niekalki zdymkaŭ ptuški ŭ palocie. Ja prahladzieŭ ich užo ŭ chacie i spačatku dumaŭ, što heta aroł-mahilnik i tolki potym uspomniŭ pra arłana-daŭhachvosta. Znajšoŭ u internecie zdymki maładych ptušak, jakija vyhladali vielmi padobnymi da našaj. Źviarnuŭsia da Andreja Kavalenki, arnitołaha z Kazachstana i jon paćvierdziŭ vyznačeńnie.
Fota Alaksandry Kudzinavaj, pa jakim vyznačyli ptušku
Arłan-daŭhachvost maje nievialiki hniezdavy areał: napeŭna, vid hniazduje zaraz tolki na paŭnočna-ŭschodnim uskrajku Indyi i ŭ Banhładeš.
Vid, jaki žyvie na poŭdzień ad Himałajaŭ, sustrečy jakoha adzinkavyja navat u Azii za miežami hniezdavoha areała, znojdzieny ŭ Biełarusi! U jaho jość unikalnaja asablivaść, jakaja doŭhi čas uvodziła ŭ zman navukoŭcaŭ. Heta adzinaja ptuška paŭnočnaha paŭšarja (prynamsi drapiežnaja), jakaja razmnažajecca na poŭdni svajho areała zimoj i mihruje na poŭnač na letni pieryjad. Hety małady arłan-daŭhachvost pavinien byŭ ździejśnić vandroŭku daŭžynioj prynamsi 5 tys. km, kab stać siensacyjaj u Biełarusi, — prakamientavaŭ znachodku Valer Dambroŭski, viadučy navukovy supracoŭnik NPC NAN Biełarusi pa bijaresursach.
Arłan-daŭhachvost znachodzicca na miažy źniknieńnia. Kolkaść ptušak asabliva źniziłasia ŭ druhoj pałovie 20 st. Pryčyny dakładna nieviadomyja.
Alaksandr Vinčeŭski, dyrektar APB kaža:
«Viadomyja adzinkavyja sustrečy arłanaŭ-daŭhachvostaŭ u Rasii, Ukrainie i Polščy. Maładyja ptuški hetaha vidu vielmi padobnyja da maładych arłanaŭ-biełachvostaŭ, i časam arnitołahi niapravilna vyznačali navat zdabytych ptušak. Heta ptuška dobra sfatahrafavana. Nieviadoma, kolki arłan budzie siadzieć pad Minskam, ale zaraz ptuškary ŭsich susiednich krain spadziajucca na jaje vizit!»
Paśla zaćviardžeńnia Biełaruskaj arnitafaŭnistyčnaj kamisijaj arłan-daŭhachvost stanie 338-m vidam u śpisie ptušak Biełarusi.
