«Zvolnieny.
Zahad N 186-k ad 2021/07/30.
Siońnia ja vyjšaŭ z dyspansiera jak u adkryty kosmas. Apošni dzień majoj pracy ŭ jakaści kiraŭnika i doktara-śpiecyjalista psichanieŭrałahičnaha dyspansiera UZ «Maładziečanskaja CRB».
Vosiem hadoŭ tamu mnie paščaściła ŭznačalić hetaje strukturnaje padraździaleńnie. Zzadu 17 hadoŭ. Lepšych hadoŭ ź lepšym kalektyvam.
Fota sa staronki ŭ instahramie
Siabry-kalehi — vy nievierahodnyja. Ja zastajusia pierakanany ŭ nadziejnaści našaj kamandy. Stojkaść i ŭpeŭnienaść, śmiełaść namieraŭ i empatyja, a taksama adkrytaść u pradjaŭleńni siabie i svaich dumak dazvolać zachavać cełasnaść, kaštoŭnaści i kampietencyi.
Napieradzie niavyznačanaść. Va ŭsich byvaje. Viera daje nadzieju. Pieramieny niastrašnyja. U mianie ŭpieršyniu jość status biespracoŭnaha.
Heta niezvyčajna, ale niastrašna. Vybar i svaboda. Mnie bolš padabajecca słova «pierśpiektyva».
Škaduju ab tym, što nie zmoh, i ciešusia za zroblenaje. Za apošni miesiac pastaraŭsia pakłapacicca pra ŭsich, za kaho byŭ u adkazie jak doktar (…).
Jość horyč škadavańnia za paru-trojku ludziej. Heta novy dośvied.
Ździŭlacca šmatstajnaści formaŭ pavodzin ludziej ja pierastaŭ daŭno, adnak u hety raz vyprabavaŭ novyja dla mianie pačućci.
Asobnaje pryznańnie — tym, chto vykazvaŭ słovy padziaki i pieradavaŭ padtrymku. Prychodzili padziaki asabistyja i kalektyŭnyja, u knihu vodhukaŭ i ŭ vyhladzie zvarotaŭ. Spahadlivaść i dabrynia dajuć siły.
Ja ŭdziačny kožnamu, z kim mnie daviałosia pracavać i kamu mieŭ honar dapamahać. Kožnaja sustreča, niezaležna ad praciahłaści, maje fienomien kantaktu duš. Chto jak nie psichijatry pra heta viedajuć.
Fota sa staronki ŭ instahramie
Ja płanuju i dalej praktykavać jak śpiecyjalist pa akazańni psichijatryčnaj, narkałahičnaj i psichaterapieŭtyčnaj dapamohi, a taksama realizoŭvać isnyja navyki kiraŭnika.
Prymu za honar być karysnym Vam.
Udačy i pośpiechaŭ. Bieražycie siabie i zachoŭvajcie psichičnaje zdaroŭje».
