U MZS nahadali, što zhodna z Damovaj ab Jeŭrazijskim ekanamičnym sajuzie, padpisanaj 29 maja 2014 hoda, meta stvareńnia abjadnańnia — zabieśpiačeńnie svabody pieramiaščeńnia tavaraŭ, pasłuh, kapitału i rabočaj siły, stvareńnie ŭmoŭ dla stabilnaha raźvićcia ekanomik dziaržaŭ-členaŭ u intaresach pavyšeńnia dabrabytu ich narodaŭ.
Kazachstan prytrymlivajecca pazicyi, što intehracyjnyja pracesy ŭ miežach JEAES nosiać ekanamičny charaktar. «Tradycyjna adznačajem nieprymalnaść nadzialeńnia orhanaŭ jeŭrazijskaj intehracyi nieŭłaścivymi funkcyjami, vystupajem suprać palityzacyi abjadnańnia», havorycca ŭ paviedamleńni.
«U kantekście abmierkavańnia inicyjatyŭ, jakija vychodziać za miežy pradmieta rehulavańnia Damovy ab JEAES, u tym liku pa pryniaćci mier u adkaz na sankcyjnyja dziejańni trecich krain, zychodzim z taho, što sankcyi Zachadu majuć u svajoj asnovie, pierš za ŭsio, palityčnyja matyvy i nakiravany suprać asobnych dziaržaŭ, a nie ŭsiaho JEAES. Adznačajem, što Respublika Kazachstan nijakich pieramovaŭ ab «kansalidavanych mierach» krain JEAES u adkaz na sankcyi inšych dziaržaŭ nie viadzie. U pracy z partniorami pa jeŭrazijskaj intehracyi havorka moža iści tolki ab sumiesnych dziejańniach pa niedapuščeńni niehatyŭnaha ŭpłyvu takich sankcyj na sacyjalna-ekanamičnaje raźvićcio našych dziaržaŭ», — vynikaje z raspaŭsiudžanaha paviedamleńnia MZS Kazachstana.
Vice-ministr handlu i intehracyi Žanel Kušukova taksama paviedamiła, što na placoŭcy JEAES pytańnie prymianieńnia jakich-niebudź kalektyŭnych mier u adkaz na sankcyi trecich krain nie prapracoŭvajecca i nie abmiarkoŭvajecca.
«Bolš za toje, takija pytańni naohuł nie ŭvachodziać u kampietencyju Jeŭrazijskaha sajuza i nie stajać na paradku dnia. Respublika Kazachstan z momantu stvareńnia JEAES prytrymlivajecca pazicyi, što heta abjadnańnie nosić vyklučna ekanamičny charaktar. My pryncypova suprać palityzacyi našych uzajemaadnosin u miežach Sajuza i pryniaćcia mier, jakija mohuć paŭpłyvać na adnosiny z trecimi krainami», — skazała jana.
Vice-ministr adznačyła, što sankcyi, jakija prymianiajucca suprać asobnych krain JEAES, u toj ci inšaj stupieni akazvajuć upłyŭ na stan ekanomik usich dziaržaŭ-členaŭ.
«Uličvajučy ciesnyja ekanamičnyja suviazi našych dziaržaŭ, zaraz abmiarkoŭvajecca pytańnie vypracoŭki mahčymych sumiesnych mier, nakiravanych na minimizacyju ekanamičnych nastupstvaŭ dla ekanomiki dziaržaŭ-členaŭ JEAES ad sankcyjnaha ŭździejańnia na asobnyja krainy JEAES. Ale kalektyŭnyja miery ŭ adkaz na sankcyi, miery ekanamičnaha cisku ci inšyja vidy ŭździejańnia na ŭzajemaadnosiny z zamiežnymi dziaržavami nie stajać na paradku dnia ŭ ramkach JEAES. Heta pryncypovaja i niaźmiennaja pazicyja Respubliki Kazachstan», — padkreśliła Žanel Kušukova.
Raniej ab tym, što ŭ JEAES prapracoŭvajecca kansalidavany adkaz na sankcyi Zachadu, zajaviŭ namieśnik kiraŭnika MZS RF Alaksandr Pankin.
