Na fonie supiarečlivych zajaŭ niekalkich zacikaŭlenych uradaŭ i nieaktyŭnaha supracoŭnictva ŭ rasśledavańni avijakampanii Ryanair polskija i litoŭskija śledčyja jašče nie rasšyfravali infarmacyju, što zachoŭvajecca ŭ čornaj skryni samalota, paviedamlaje The Wall Street Journal.
U čornaj skryni musiać zachoŭvacca źviestki, važnyja dla pravilnaha razumieńnia taho, što adbyłosia 23 maja u pavietranaj prastory Biełarusi. Adnak palityčny charaktar incydentu značna ŭskładniaje rasśledavańnie.
«Bolšaść rasśledavańniaŭ pačynajecca z vyznačeńnia taho, što pavinna było adbycca, a zatym vyvučajecca, što adbyłosia», — śćviardžaje Konar Nołan, kiraŭnik Fondu biaśpieki palotaŭ u Virdžynii. «U hetym vypadku składana zrazumieć, što pavinna było adbycca, bo niezrazumieła, nakolki praŭdzivymi źjaŭlajucca zychodnyja źviestki», — dadaje ekśpiert.
Litva i Polšča jašče nie vyrašyli, kudy jany dašluć čornuju skryniu dla analizu, bo šukajuć krainu, jakaja nie budzie palityčna pieraduziataj.
Da hetaha času dakładna nieviadoma, što adbyłosia pamiž biełaruskimi ŭładami i piłotami Ryanair. Situacyju ŭskładniaje datyčnaść da hetaha incydentu niekalkich dziaržaŭ. Samalot naležyć irłandskaj kampanii, ale zarehistravany ŭ Polščy. Zhodna z praviłami, jakija rehulujuć mižnarodnyja avijacyjnyja rasśledavańni, heta značyć, što rasśledavańnie musić uznačalić Polšča.
U rasśledavańni taksama majuć prava brać udzieł Hrecyja, Irłandyja, Litva i śledčyja ź luboj krainy, hramadzianie jakoj znachodzilisia na borcie Ryanair u toj dzień. FBR udzielničaje ŭ rasśledavańni, bo ŭ samalocie znachodzilisia hramadzianie ZŠA.
Litva i Polšča tolki na hetym tydni vyrašać, kudy dasyłać dyktafony z čornaj skryni. Nivodnaja z hetych krain nie vałodaje techničnymi mahčymaściami dla praviadzieńnia analizu.
Kiraŭnik Litoŭskaha biuro kryminalnaj palicyi zajaviŭ, što rasčaravany supracoŭnictvam Ryanair u rasśledavańni. «Supracoŭnictva praciahvajecca, ale my ličym, što jano mahło b być chutčejšym i intensiŭniejšym», — adznačaje jon.
