Na videa vidać, jak 50-hadovy palitviazień chistajecca i padaje pry sprobie schadzić u tualet. Dalej jamu pieraviazvajuć hałavu.
Paźniej jon padaje jašče raz.
SK śćviardžaje, što paśla druhoha padzieńnia dla akazańnia dapamohi mužčynu byli vyklikanyja rabotniki miedycynskaj častki i chutkaj miedycynskaj dapamohi, ale, niahledziačy na praviedzienyja miedykami reanimacyjnyja mierapryjemstvy, vyratavać mužčynu nie ŭdałosia.
Z-za čaho kankretna jon upaŭ i raźbiŭ hałavu — z apublikavanaha videa nie zrazumieła.
Videa ŭjaŭlajuć saboj narezku kadraŭ, niezrazumieła, što było da pieršaha padzieńnia i pierad druhim.
Sa słoŭ supracoŭnikaŭ kałonii, asudžany, raźbiŭšy hałavu, skarhaŭ na stan zdaroŭja nibyta nie vykazvaŭ, nibyta admoviŭsia ad dapamohi i špitalizacyi.
Miarkujučy pa nadpisie na śpinie, Ašurka ŭtrymlivali ŭ štrafnym izalatary. Čamu i ź jakoha času — u paviedamleńni SK nie tłumačycca.
Raniej prablem sa zdaroŭjem Ašurak nie mieŭ, śćviardžajuć jaho svajaki i siabry.
Nahadajem, cieła 50-hadovaha palitviaźnia Vitolda Ašurka, pra śmierć jakoha paviedamili ŭ kałonii Škłova ŭ piatnicu, addali svajakam dniom u aŭtorak. Siabroŭka siamji Volha Bykoŭskaja raskazała, što ŭ Vitolda «zabintavanaja hałava ad makaŭki da nosa, bačny tolki rot».
Palitviazień ź Biarozaŭki Vitold Ašurak, jakoha 18 studzienia ŭ Lidzie na zakrytym pracesie prysudzili da 5 hadoŭ kałonii ahulnaha režymu, pamior u škłoŭskaj kałonii. Jamu było 50 hadoŭ. Ašurak byŭ siabram Partyi BNF, kaardynataram ruchu «Za Svabodu», čałaviek byŭ biaskonca addany Biełarusi. Apošnija dva tydni ad Vitolda nie było listoŭ.
U kałonii ŭ Škłovie «palityčnym» našyvajuć žoŭtyja birki, pisaŭ z kałonii Ašurak.
«Palityčnych tut nie brakuje. Tak što sumavać nahody niama. Tym bolš, što administracyja vydała zahad mieć žoŭty koler birak na adzieńni, i tamu palityčnych možna adroźnić zdalok», — pisaŭ palitviazień.
Čytajcie taksama: Palitviazień Ašurak, jaki atrymaŭ 5 hadoŭ źniavoleńnia: Haładrancy i nas chočuć zrabić haładrancami
«Što tyčycca mianie, to termin u 5 hod ja ŭsprymaju jak adznaku «vydatna» za toje, što mieŭ honar padniać pachodniu paŭstańnia suprać dyktatury siarod samych lepšych ludziej Lidy! Sapraŭdy, dla mianie heta honar!» — pisaŭ Ašurak z kałonii.
Čytajcie taksama: Asudžany na 5 hadoŭ palitviazień Vitold Ašurak: Upeŭnieny, što ciaham 2021 hoda ja apynusia na voli
Ašurka sudziŭ sudździa Maksim Fiłataŭ za začynienymi dźviaryma pa dvuch artykułach: 364 «Hvałt ŭ dačynieńni da supracoŭnika orhanaŭ unutranych spraŭ» i 342 «Arhanizacyja i padrychtoŭka dziejańniaŭ, jakija hruba parušajuć hramadski paradak». Pa pieršym artykule sud pastanaviŭ pakarać aktyvista čatyrma hadami kałonii, a pa druhim — dvuma hadami i čatyrma miesiacami. Šlacham častkovaha pahłynańnia atrymałasia piać hadoŭ.
Ašurak naradziŭsia ŭ 1970 hodzie ŭ vioscy Aharodniki la Biarozaŭki. Jak i mnohija inšyja miascovyja chłopcy, paśla škoły ŭładkavaŭsia na škłozavod «Nioman», dzie pracavaŭ vydźmuvalnikam. Pracavaŭ až da toj pary, pakul zavod trochi trymaŭsia i tam płacili niejkija zarobki. Kali ž u ekanamičnym płanie pradpryjemstvu stała zusim kiepska, to Vitold adtul zvolniŭsia.
Paśla hetaha pačaŭ zarablać na žyćcio budaŭničymi pracami, u jaho była bryhada, razam ź jakoj i jeździŭ na roznyja abjekty, dajazdžali tak navat da Stolina. Aficyjna byŭ niepracaŭładkavany.
Znakavym hodam dla śvietapohladu Ašurka staŭ 2010, kali prachodzili prezidenckija vybary.
Na praciahu 2017-2018 hadoŭ Vitold Ašurak razam sa svaimi paplečnikami adnaviŭ miž vioskami Małoje Ołažava i Mochavičy miemaryjał pamiaci paŭstancam Kalinoŭskaha.
Vitold byŭ žanaty bolš za dziesiać hadoŭ, dziaciej u siamji nie było.
Ašurka ŭpieršyniu zatrymali 9 žniŭnia, u dzień vybaraŭ. Sud pakaraŭ aktyvista 20 sutkami: 15 — za ŭdzieł u niesankcyjanavanym mierapryjemstvie i piać — za niepavahu da suda, admoviŭsia ŭstać, kali źjaviŭsia sudździa. Adnak praź piać dzion jaho adpuścili, jak i amal usich tahačasnych palitviaźniaŭ, što adbyvali administracyjnaje pakarańnie. Tym nie mienš, kryminalnuju spravu zaviali ŭžo tady.
16 vieraśnia Ašurka zabrali paŭtorna, mała taho, što jamu zastavałasia adbyć 15 sutak ź minułaha, dyk dadali jašče 15 — za ŭdzieł u mierapryjemstvach u Lidzie ŭ žniŭni — vieraśni. Kali Vitoldu zastavałasia adbyć 2-3 sutak, jaho pieraviali ŭ hrodzienskaje SIZA pa kryminalnym artykule.
Čytajcie taksama: «Tataryn, dahiestaniec i hrek — troje biełaruskich nacyjanalistaŭ»: historyja palitviaźnia Vitolda Ašurka
