viciebskspring.org
Anhielinu zatrymali razam z 18-hadovym Rusłanam Janievičam, ale chłopca paźniej adpuścili.
U Čyhunačnym RAUS na jaje skłali pratakoł pavodle č.3 art. 24.23 KaAP i źmiaścili ŭ izalatar časovaha ŭtrymańnia, dzie jana i prabyła troje sutak da suda. Aryštavanyja dva telefony dziaŭčyny. Sudovaje pasiadžeńnie prajšło siońnia z vykarystańniem Skype. Spravu raźbirała sudździa Alena Cyhankova.
Pavodle milicejskaha pratakoła, Anhielina Turaviec 9 maja, znachodziačysia kala domu 24 na vuł. Kalinina, mieła na tvary masku čornaha koleru ź bieł-čyrvona-biełaj vyjavaj na joj «dla publičnaj demanstracyi» — i hetkim čynam praviała adzinočnaje pikietavańnie z metaj vykazvańnia svaich hramadska-palityčnych intaresaŭ.
Dziaŭčyna nie zhadziłasia z pratakołam i svajoj viny nie pryznała. Patłumačyła na sudzie, što prosta pryjšła pahladzieć na parad Pieramohi ŭ centry Viciebsku, bo štohod razam z baćkam adznačaje śviata mienavita takim čynam. Śćvierdziła, što ŭ čornaj mascy z vyjavaj uśmieški («biełyja zuby — čyrvony jazyk») chodzić jašče sa śniežnia 2020 hoda.
«Prysutničała ŭ joj na sudach, była ŭ joj u śledčym kamitecie, nie zdymała hetuju masku, kali razmaŭlała z načalnikam Viciebskaha RAUS 25 sakavika — i nichto mnie nie rabiŭ nakont jaje nijakich zaŭvah, nie papiaredžvaŭ i nie rekamiendavaŭ pierastać jaje nasić», — zapeŭniła na sudzie Anhielina Turaviec. Padkreśliła, što nie maje inšaj maski.
Advakatka prasiła viarnuć spravu na dapracoŭku, bo było šmat niedakładnaściaŭ — naprykład z časam zatrymańnia. Vyjaviłasia taksama, što Anhielinu nie aznajomili z pratakołam zatrymańnia. Ale hetuju prośbu sudździa Alena Cyhankova adchiliła.
Na dumku sudździ, vina Turaviec «znajšła svajo paćvierdžańnie». Alena Cyhankova pastanaviła pakarać Anhielinu Turaviec za ŭdzieł u niesankcyjanavanym pikietavańni (č.3 art. 24.23 KaAP) administracyjnym aryštam na 20 sutak.
Da hetaha Anhielinu Turaviec užo 4 razy pryciahvali da adkaznaści za parušeńnie zakanadaŭstva ab masavych mierapryjemstvach. Jaje karali štrafami i aryštami. U lutym 2021 hodu ŭ dačynieńni maci Anhieliny Taćciany Turaviec była zaviedzienaja kryminalnaja sprava za ŭžyvańnie hvałtu da supracoŭnikaŭ MUS (art. 364 KK), jakaja razhladajecca ciapier sudom Viciebskaha rajona.
