Nazar Hulevič, fota z sacsietak.
Nazar Hulevič naradziŭsia i žyŭ u Biełarusi, i ŭžo z 12 hod staŭ adčuvać siabie chłopčykam. U našaj krainie jon i ździejśniŭ transhiendarny pierachod, jaki ŭ Biełarusi pravodzicca całkam biaspłatna, kali dla hetaha jość miedycynskija pakazčyki. U 2008 hodzie jon vydaliŭ sabie hrudzi, ale apieracyju na pałavych orhanach nie pravioŭ. Čamu? Roznyja krynicy kažuć roznaje: ci to nie chacieŭ, ci to nie paśpieŭ.
Paśla taho, jak Nazar atrymaŭ pašpart na mužčynskaje imia, jamu daviałosia navat trapić u biełaruskaje vojska, adsłužyŭ jon svoj termin u kinałahičnaj słužbie. Pa słovach ciapierašniaj žonki mužčyny, u biełaruskim vojsku viedali pra jaho asablivaści i stavilisia «z parazumieńniem».
Z pačatku 2000-ch Nazar Hulevič staŭ jeździć u Maskvu na zarobki, nieŭzabavie pierabraŭsia tudy na stałaje žycharstva. Pracavaŭ pieravažna na budoŭlach, vučyŭsia va ŭniviersitecie pa śpiecyjalnaści «mytnaja sprava», navat zaśviaciŭsia ŭ adnym z epizodaŭ prahramy «Bitva ekstrasensaŭ». U Maskvie jon paznajomiŭsia sa svajoj ciapierašniaj žonkaj (para ažaniłasia, kali Nazar užo byŭ u SIZA).
Čytajcie taksama: Transhiendar z Maładziečna ažaniŭsia ŭ rasijskaj turmie
U 2018 hodzie mužčynu zatrymali za machlarstva: pa papierach jon byŭ dyrektaram padstaŭnoj firmy, jakaja pa padroblenych dakumientach zavałodała čužoj kvateraj. Sam transmužčyna vinavaciŭ va ŭsim svaich saŭdzielnikaŭ. U intervju «Moskovskomu komsomolcu» jon davodziŭ, što spačatku nie razumieŭ, u što ŭviazaŭsia, a kali zapadozryŭ niadobraje, pasprabavaŭ źbiehčy, ale jaho złavili i pahrozami prymusili padpisać patrebnyja dla ździełki dakumienty.
Sud nie pavieryŭ Huleviču i prysudziŭ jamu 4 hady kałonii ŭ lutym hetaha hoda. Z ulikam taho, što ŭvieś čas ad zatrymańnia da suda mužčyna pravioŭ u SIZA, dzie dzień zaličvajecca za paŭtara, jamu zastałosia prabyć u kałonii kala 4 miesiacaŭ.
Usie dni da suda jon pravioŭ u metach biaśpieki ŭ adzinočnaj kamiery žanočaha SIZA№6, ciapier jaho chočuć nakiravać u mužčynskuju kałoniju. Siamja asudžanaha i sam Nazar Hulevič bajacca, što jaho čakajuć nievynosnyja ŭmovy, ździeki i hvałt.
«U mužčynskich kałonijach transhiendarnyja ludzi pa zmoŭčańni traplajuć u najnižejšuju kastu. Ci buduć jany padviarhacca seksualnamu hvałtu, zaležyć ad situacyi ŭ kankretnym miescy, ale łamać psichałahična takoha čałavieka pačnuć u lubym vypadku», — upeŭnieny pravaabaronca Leanid Ahafonaŭ.
U Rasii na dadzieny momant niama śpiecyjalizavanych papraŭčych ustanoŭ dla transhiendarnych ludziej. Adnym z vychadaŭ ź situacyi mahła b stać praktyka pakidać takich ludziej u SIZA na ŭvieś termin, pryčym rasijski Kryminalna-vykanaŭčy kodeks dazvalaje rabić heta ŭ vyklučnych vypadkach, dy i ź niekatorymi tranśludźmi tak užo pastupali, adznačajuć pravaabaroncy.
Adnak jakoje rašeńnie prymuć u mienavita ŭ situacyi Nazara Huleviča, pakul nieviadoma.
