Viersija śledstva. «Kardziukoŭ vyrašyŭ zabić adnaho z vajskoŭcaŭ»
Viersiju śledstva ahučyŭ prakuror Bury.
Pavodle materyjałaŭ spravy, Hienadź Šutaŭ i Alaksandr Kardziukoŭ uviečary 11 žniŭnia vypili 350 hramaŭ mocnaj nastojki ŭ haražy Kardziukova, paśla čaho pajšli na vulicu Maskoŭskuju. Kardziukoŭ pry hetym mieŭ z saboj kavałak mietaličnaj truby. Na placoŭcy pamiž damami 334 i 336 u ich uźnik kanflikt z vajskoŭcami Haŭryłavym i Halicynym, jakija znachodzilisia tam u cyvilnaj vopratcy i mieli pry sabie pistalety Makarava.
«11 žniŭnia 2020 hoda ŭ Respublicy Biełaruś isnavaŭ vysoki ŭzrovień masavych biesparadkaŭ, — skazaŭ prakuror. — U suviazi z hetym da achovy paradku pryciahvalisia vajskoŭcy, kapitan Haŭryłaŭ i praparščyk Halicyn».
Pavodle viersii śledstva, Kardziukoŭ i Šutaŭ «metanakiravana padyšli da Haŭryłava i Halicyna», paśla čaho Kardziukoŭ «nanios udar Haŭryłavu mietaličnaj truboj».
«Kardziukoŭ vyrašyŭ zabić adnaho z vajskoŭcaŭ, — skazaŭ dziaržaŭny abvinavaŭca. — Haŭryłavu jon nanios udar truboj u hałavu, čym pryčyniŭ jamu lohkija cialesnyja paškodžańni. Zatym kinuŭ mietaličnuju trubu ŭ hrudnuju kletku inšamu vajskoŭcu».
Pavodle viersii abvinavačvańnia, kapitan Haŭryłaŭ, abaraniajučysia, spačatku streliŭ u pavietra, a potym vyrašyŭ strelić u Hienadzia Šutava, «u vobłaść levaha pieradplečča». Adnak ad taho, što nie zmoh skancentravacca paśla ŭdaru pa hałavie, trapiŭ Šutavu ŭ patylicu.
Kapitan Raman Haŭryłaŭ padčas suda pryznaŭ, što zastreliŭ Hienadzia Šutava. Jon taksama śćviardžaje, što sprabavaŭ akazać Šutavu pieršuju dapamohu, dapamahaŭ adpravić paciarpiełaha razam z mašynaj «chutkaj dapamohi».
Viersija abvinavačanaha. «Tvaram uniz, urody. Zavalu!»
Abvinavačany Alaksandr Kardziukoŭ śvioj viny kateharyčna nie pryznaje.
Jon pahadžajecca, što ŭviečary 11 žniŭnia piŭ ałkahol z Šutavym, paśla čaho jany razam vyrašyli schadzić na vulicu Maskoŭskuju, kab pabačyć pratesty na svaje vočy.
Kardziukoŭ havoryć, što pa darozie ŭ parku sapraŭdy znajšoŭ kavałak mietaličnaj truby i ŭziaŭ jaje z saboj «dla samaabarony». Razam z Šutavym jany byli la doma № 334 na vulicy Maskoŭskaj kala 40 chvilin, razmaŭlali pamiž saboj. Paśla zaŭvažyli pobač na łavie dvuch maładych chłopcaŭ u cyvilnym i padyšli da ich pahavaryć.
«My nie viedali, što heta vajskoŭcy, jany byli ŭ cyvilnym, — skazaŭ Alaksandr Kardziukoŭ. — Spytali ŭ ich, što tut adbyvajecca. Adrazu paśla hetaha pačaŭsia kanflikt. Adzin z vajskoŭcaŭ udaryŭ mianie, ja, padajučy, udaryŭ jaho pa ściahnie truboj. Halicyn i Haŭryłaŭ pačali adstupać ad nas śpinami ŭpierad, dastali pistalety i kryčali «Tvaram uniz, urody, zavalu!»
Kardziukoŭ nastojvaje, što nie biŭ vajskoŭcaŭ pieršym i tym bolš pa hałavie truboj. Kaža, što paśla pieršaha strełu kinuŭ trubu i pačaŭ uciakać. Taksama jon bačyŭ, jak Šutaŭ stanaviŭsia na kaleni śpinaj da Haŭryłava i Halicyna, paśla čaho pačuŭ jašče adzin streł.
«Ja byŭ u šokavym stanie, — skazaŭ Alaksandr Kardziukoŭ. — U mianie stralali pieršy raz. Paśla tych padziej ja adčuvaŭ vinu pierad Hienadziem, što my tudy pajšli. Jon nie pajšoŭ by tudy adzin, bieź mianie. Ja viedaŭ pra sutyčki z AMAPAm u Breście i ŭ papiarednija dni. Pa horadzie chadzili čutki, što AMAP stralaŭ u ludziej, kidaŭ hranaty. Z boku Halicyna ŭ moj bok taksama byŭ streł. Kali b ja nie ŭciok adtul, to byŭ by zastreleny hetaksama, jak i Hienadź Šutaŭ».
Paśla dopytu abvinavačanaha i paciarpiełych na pracesie dapytajuć śviedak i vyvučać materyjały spravy. Dačka Hienadzia Šutava zajaviła sudu, što choča damahčysia apraŭdańnia jaje zahinułaha baćki.
Alaksandr Kardziukoŭ naradziŭsia ŭ Kobrynie ŭ 1979 hodzie. Žanaty, razam z žonkaj haduje niepaŭnaletniaje dzicia. U 2010 hodzie byŭ asudžany za chulihanstva, adbyŭ pakarańnie ŭ vyhladzie hramadskich rabot. Da 2011 hodu pracavaŭ u aŭtobusnym parku Bresta, paśla pieršaha suda zajmaŭsia padpracoŭkami, źbiraŭsia zarehistravacca indyvidualnym pradprymalnikam.
