Sudździa Pieršamajskaha rajona Śviatłana Čarapovič vyniesła prysud: Hłuchoŭskaha pryznać vinavatym pavodle č. 1 art. 342 KK RB (Arhanizacyja i padrychtoŭka dziejańniaŭ, jakija hruba parušajuć hramadski paradak) i pryznačyć pakarańnie na try hady ŭ vyhladzie abmiežavańnia voli biez nakiravańnia ŭ vypraŭlenčuju ŭstanovu, piša Tut.by.
Dziaržabvinavaŭca zapytvała taksama zadavolić pazoŭ prakuratury ŭ intaresach «Minsktransa» za błakavańnie transpartu z sumaj škody — 10 689 rubloŭ 76 kapiejek. Adnak hety pazoŭ buduć razhladać asobna, u hramadzianskim sudzie.
Što heta za sprava?
Michaił Hłuchoŭski — kiroŭca na adnoj z vytvorčaściej u Minsku, jamu 48 hadoŭ. Na pieršym sudovym pasiadžeńni mužčyna raspavioŭ, što 1 listapada vyjšaŭ na marš kala parku Čaluskincaŭ, kab vykazać svoj pratest: spačatku išoŭ pa tratuary, potym razam ź inšymi pratestoŭcami vyjšaŭ na prajeznuju častku.
Tady Hłuchoŭskaha zatrymali pa artykule 342 KK RB, dali štraf — 20 bazavych pa artykule 23.34 KaAP. U śniežni Michaiła asudzili pa artykule 23.34 KaAP za druhi, bolš rańni, marš. Tady pryznačyli 15 bazavych. Štrafy mužčyna vypłaciŭ.
Pa spravie za 1 listapada paciarpiełym pryznany «Minsktrans», arhanizacyja vystaviła hramadzianski pazoŭ z sumaj škody 10 689 rubloŭ 76 kapiejek, matyvujučy heta tym, što kala 30 maršrutaŭ hramadskaha transpartu byli zabłakavanyja ŭ rajonie ad parku Čaluskincaŭ, Zialonaha Łuha i da MKAD z-za maršu. Taki ž pazoŭ i z takoj ža sumaj u intaresach «Minsktransa» vystaviła prakuratura.
Mužčyna ličyć siabie vinavatym častkova. Zhodny tolki z tym, što ŭdzielničaŭ u Maršy, vychodziŭ na prajeznuju častku, ale nie zhodny z pamieram škody i toj kolkaściu maršrutaŭ, jakija nie pracavali nibyta z-za jaho. Pa jaho słovach, na prajeznaj častcy jon byŭ piać chvilin. Pry zatrymańni supracivu nie akazvaŭ, pavodziŭ siabie karektna.
Na sudzie taksama vystupali śviedki ŭ bałakłavach — supracoŭniki AMAP. Nichto ź ich Hłuchoŭskaha na maršy nie zatrymlivaŭ i nie moh dakładna ŭspomnić, ci bačyŭ jaho na maršy. Zabłakavanaha transpartu pa šlachu jany taksama nie bačyli, bo byli ŭ mašynie.
Raniej pisali, što 1 listapada ŭ Minsku prachodziŭ niadzielny marš, paśla jakoha zatrymali sotni ludziej. Zaviedziena kryminalnaja sprava pa fakcie arhanizacyi dziejańniaŭ, jakija hruba parušajuć hramadski paradak, i aktyŭnaha ŭdziełu ŭ ich. 231 čałaviek pryznany padazravanym pa č. 1 art. 342 Kryminalnaha kodeksa. Sankcyja artykuła praduhledžvaje pakarańnie ad štrafu da troch hadoŭ pazbaŭleńnia voli.
