Studentka Naścia adbyvała administatyŭny aryšt u Centry izalacyi pravaparušalnikaŭ na Akreścina ŭ 24-j kamiery. Heta akurat nasuprać 15-j, dzie siadzieŭ błohier Eduard Palčys.
Z 27 vieraśnia miescaznachodžańnia Palčysa było nieviadomaje, potym jon znajšoŭsia na Akreścina.
Studentka raskazała «Našaj Nivie», jak jon tam byŭ.
«Zdajecca, u jaho była abo 4-miascovaja, abo 6-miascovaja kamiera, bolšuju častku času jon siadzieŭ adzin. Pieryjadyčna da jaho kahości padsadžvali, ale my nie zrazumieli, chto heta byŭ i dla jakich metaŭ, bo ich chutka vyvodzili. Nam udavałasia pahavaryć, kali nas karmili: tady adkryvajucca «karmuški», jość mahčymaść ubačyć, što adbyvajecca nasuprać, pierakinucca paraj słovaŭ. Niešta skazać pra maralny stan Eduarda ciažka, viadoma, jon pryhniečany, ale nastroj usio ž bolš badziory za toj, jaki možna było b čakać.
Nijakaja karespandencyja da jaho nie dachodziła, na prahułki nie vyvodzili, pieradač nie było taksama. Skardziŭsia, što miesiac nie moža paznohci pastryhčy. Jon iranizavaŭ, što kali jamu «pryšyjuć» kryminałku, to stanie praściej, bo dla kryminalnych umovy isnavańnia miahčejšyja.
Cikaviŭsia ŭ nas pra naviny, pytaŭsia, jaki ciapier kurs dalara. A my jamu zakidvali praz karmušku liściki z drevaŭ, jakija padbirali na vulicy na prahułcy. Kali staviać nasuprać kamiery tvaram da ściany, to možna zakinuć.
U toj dzień, kali jaho mielisia adpuskać, na abychodzie skazali, što adpuściać u 14:30. Ale raniej za hety čas da jaho pryjšli i paviedamili, što «pierazatrymlivajuć» u ramkach niejkaj kryminalnaj spravy. Eduard pierapytaŭ, što za sprava, ale my nie čuli adkazu — imavierna, jamu pakazali ŭ piśmovym vyhladzie.
Taksama byŭ momant, što prasili padpisać admovu ad advakata: maŭlaŭ, jon «niepatrebny na hetym etapie». Ja nie viedaju, ci padpisaŭ Palčys. Paśla taho my jaho nie bačyli, imavierna, jaho pieraviali ŭ inšuju kamieru abo inšuju ŭstanovu».
Čytajcie taksama. Jon pakazaŭ, što biełaruskaja nacyjanalnaja ideja moža być papularnaj. Čamu Eduard Palčys — kruty
