19 žniŭnia arcybiskup Tadevuš Kandrusievič pamaliŭsia pad ścienami izalataraŭ na vulicy Akreścina ŭ Minsku, jakija stali simvałam katavańniaŭ mirnych hramadzian, niazhodnych z falsifikacyjami na vybarach, paviedamlaje catholic.by
Staršynia Kanfierencyi Katalickich Biskupaŭ u Biełarusi naviedaŭ hetaje miesca bolu i ciarpieńnia razam z supracoŭnikami Dabračynnaha katalickaha tavarystva Caritas, Chryścijanskaha sacyjalnaha centra «Dabračynnaj misii Dobraha samaranina» i vałanciorami, jakija ŭsimi siłami imknucca padtrymać ludziej, što apynulisia ŭ ciažkaj žyćciovaj situacyi.
U siaredzinu arcypastyra nie ŭpuścili. Na vulicy, pad daždžom ijerarch maliŭsia razam z hrupaj viernikaŭ, siarod jakich byli duchoŭnyja i kansekravanyja asoby i ŭdzielnicy ruchu «Maci ŭ malitvie».
Paśla malitvy arcybiskup bolš za hadzinu razmaŭlaŭ ź ludźmi, jakija byli źniavoleny na Akreścina, i z vałanciorami, jakija akazvajuć im dapamohu.
Sabranyja pad ścienami izalatara, jak i napiaredadni kala SIZA na vulicy Vaładarskaha, dziakavali kiraŭniku katalickaha jepiskapatu krainy za jaho pryncypovuju pazicyju nieprymańnia nasilla. Nahadajem, što Mitrapalit Minska-Mahiloŭski ŭ apošnija dni nieadnarazova źviartaŭsia z patrabavańniem vyzvalić usich niezakonna zatrymanych padčas akcyj pratestu mirnych hramadzianaŭ.
14 žniŭnia jon vykazaŭ hetaje patrabavańnie ŭ zvarocie da dziejučaha prezidenta Alaksandra Łukašenki i da ŭsich, chto ŭ dziaržavie vykonvaje ŭładu na roznych uzroŭniach, a ranicaj 18 červienia jašče adzin zvarot ijerarch skiravaŭ niepasredna ministru ŭnutranych spraŭ Juryju Karajevu. Adkazu ad uładaŭ da hetaha času niama.
