Navukoŭcy z Kałumbijskaha ŭniviersiteta ŭ Ńju-Jorku zajavili ab stvareńni preparata, jaki moža dapamahčy ŭ baraćbie z karanavirusam. Papiarednija vyniki daśledavańniaŭ jany apublikavali ŭ časopisie Nature.
Preparat ujaŭlaje saboj «kaktejl» z antyciełaŭ, zdolnych efiektyŭna źniščać virus u kryvi. Dla ich atrymańnia daśledčyki pravieryli 40 pierachvarełych na COVID-19 pacyjentaŭ i vyłučyli 61 typ antyciełaŭ, zdolnych zmahacca ź virusam. 19 ź ich byli dastatkova mahutnymi, kab źniščać čaścicy karanavirusa.
Ekśpierymienty na paddoślednych chamiakach pakazali, što adzin z hetych vidaŭ antyciełaŭ całkam źniščaje virus u tkancy lohkich. Patencyjna, injekcyja hetych antyciełaŭ moža zamianić vakcynu ad karanavirusa.
«My śpiecyjalna vyłučyli vielmi mocnyja antycieły, jakija možna masava vyrablać i zatym uvodzić pacyjentam. My miarkujem, što jany mohuć być vykarystany dla prafiłaktyki abo lačeńnia karanavirusnaj infiekcyi. My budziem vyvučać mahčymaść prymianieńnia ich dla lačeńnia na rańnich stadyjach raźvićcia zachvorvańnia, asabliva dla tych, chto maje ryzyku surjoznych uskładnieńniaŭ, heta ludzi stałaha vieku, ludzi, u jakich jość inšaja ciažkaja chvaroba», — zajaviŭ Devid Cho, kiraŭnik daśledavańnia.
Pavodle jaho słoŭ, preparat moža być zamienaj vakcyny ad karanavirusa ŭ jakaści mietadu prafiłaktyki zachvorvańnia.
Anałahičnyja daśledavańni pa stvareńni sumiesi antyciełaŭ taksama pravodziacca va Univiersitecie Taronta. Papiarednija vyniki daśledavańnia kanadskich navukoŭcaŭ publikavalisia jašče ŭ pačatku červienia.
Pavodle acenak Devida Cho z Kałumbijskaha ŭniviersiteta, vyprabavańni preparata na ludziach buduć mahčymyja ŭžo ŭ kastryčniku. Košt adnoj injekcyi moža składać $50.
Daśledavańni taho, jak prymianieńnie antyciełaŭ, vydzielenych z kryvi pierachvarełych pacyjentaŭ, moža dapamahčy ŭ baraćbie z karanavirusam, pačalisia jašče zimoj u Kitai. Pry hetym daśledčyki hruntavalisia na vopytach, jakija pravodzilisia ŭ ramkach baraćby ź inšymi zachvorvańniami, takimi jak atypovaja pnieŭmanija. U ramkach hetych daśledavańniaŭ chvorym pieralivajecca płazma kryvi ŭžo vyzdaraviełych ludziej, u jakoj utrymlivajucca antycieły.
