U paniadziełak, 22 červienia Apple na Suśvietnaj kanfierencyi dla raspracoŭščykaŭ WWDC 2020, jakaja sioleta prachodzić u anłajn-režymie, pradstaviła novuju apieracyjnuju sistemu dla iPhone — iOS 14, paviedamlajuć infarmahienctvy.
U novaj AS ikonki dadatkaŭ možna raźmiaścić na adnym ekranie — vidžety možna naładžvać pa pamiery, miescy abo abjadnoŭvać razam. Novaja funkcyja Apple Library dazvolić aŭtamatyčna arhanizoŭvać dadatki ŭ adpaviednaści z častkami. Taksama ŭ novaj iOS źjaviłasia mahčymaść prahladać videa adnačasova z vykanańniem inšych funkcyj — karcinka budzie prajhravacca ŭ kucie abo inšym zamacavanym miescy ekrana.
U novaj iOS taksama źjaviłasia funkcyja CarKey - jana dazvolić vykarystoŭvać iPhone zamiest kluča dla aŭtamabila. U Apple paviedamili, što pieršym aŭto, jaki budzie padtrymlivać hetuju funkcyju, stanie BMW 5, što vyjdzie ŭ lipieni 2020 hoda.
Akramia taho, smartfony Apple zmohuć padtrymlivać App Clips - heta skaročanaja viersija dadatku, jakim možna skarystacca, kali nie chočacca spampoŭvać poŭnuju viersiju. Naprykład, kali treba niešta apłacić abo arandavać rovar.
U novaj iOS šmat uvahi nadali pryvatnaści. Ciapier kožny dadatak budzie paviedamlać karystalniku asobnym paviedamleńniem, jakuju mienavita infarmacyju pra jaho źbiraje. Źmienicca i zbor hieałakacyjnych źviestak karystalnikaŭ: ciapier dadatkam možna dazvalać vyznačać tolki prybliznaje miescaznachodžańnie iPhone.
Infarmacyja ab zvanku na smartfonach ciapier nie budzie adlustroŭvacca na ŭvieś ekran — jana skarocicca da nievialikaha akienca. Hałasavy pamočnik Siri taksama nie budzie pakazvacca na ŭvieś ekran.
U iOS 14 dadaduć funkcyju Scribble, jakaja dazvolić vykarystoŭvać styłus Apple Pencil dla raspaznańnia i pieraŭtvareńnia rukapisnaha tekstu. Pisać uručnuju prosta na smartfonie možna budzie ŭ «pošcie», «paviedamleńniach», pošukavym radku braŭziera i ŭ inšych dadatkach.
U navušnikaŭ AirPods abnoviać prašyŭku — ciapier jany zmohuć padtrymlivać śpiecyjalny huk dla prahladu filmaŭ z efiektam zanureńnia i pieraklučacca pamiž iPhone i Mac.
Źjaviacca źmieny i ŭ dadatku iMessage - u im možna budzie zamacoŭvać kantakty i čaty, jak ciapier heta realizavana ŭ Telegram.
