Siarhieju Cichanoŭskamu praciahnuli termin znachodžańnia ŭ karcary za nienaležnuju ŭborku pamiaškańnia — supracoŭniki SIZA znajšli pad stollu pavucińnie. Pra heta Tut.by raspavioŭ advakat Siarhieja Cichanoŭskaha Viktar Mackievič.
Fota: Nadziei Bužan.
Siarhiej Cichanoŭski znachodzicca ŭ karcary ŭžo 10 dzion. Pa słovach advakata, Cichanoŭskamu dali dva spahnańni, kožnaje — pa siem sutak znachodžańnia ŭ karcary. Pieršaje spahnańnie vynieśli, kali jon jašče znachodziŭsia ŭ zvyčajnaj kamiery, za parušeńnie režymu. Druhoje — kali jon užo znachodziŭsia ŭ karcary, za drennuju ŭborku pamiaškańnia: sa słoŭ Cichanoŭskaha, u kamiery pad trochmietrovaj stollu supracoŭniki SIZA vyjavili pavucińnie.
Siońnia Cichanoŭski padaŭ skarhi na źmiaščeńnie ŭ karcar u sud Maskoŭskaha rajona, u prakuraturu horada i Upraŭleńnie departamienta ab vykanańni pakarańniaŭ pa Minsku i Minskaj vobłaści.
— Siarhiej nie padaje ducham, ale kaža, što ŭmovy ŭ karcary drennyja: tam niama pitnoj vady, tolki vada z krana, nie vielmi čystaja. Karcar — pamiaškańnie maleńkaje, biez akna, jano nie pravietryvajecca, kruhłasutačna haryć jarkaje śviatło — śviatłodyjodnaja lampa, u pamiaškańni vilhotna — u kamiery prachodzić stajak, i truba stajaka praciakaje, tamu bietonnaja padłoha pastajanna mokraja. Narmalna siadzieć faktyčna niama na čym, a łožak adkidvajuć tolki na noč z 22 da 6 hadzin ranicy. Tamu Siarhieju davodzicca šmat stajać abo rabić nievialikija kroki pa karcary. Ale ŭ jaho balić naha, jakuju jon traŭmiravaŭ jašče da zatrymańnia, tamu chadzić i stajać jamu składana, — kaža abaronca Viktar Mackievič.
Advakat błohiera padaŭ zvarot načalniku Śledčaha izalatara №1 ab nienaležnych umovach utrymańnia, u jakim prosić pravieści miedycynski ahlad Cichanoŭskaha i skaracić termin jaho znachodžańnia ŭ karcary.
— Taksama ja byŭ u prakuratury Minska i padaŭ zvarot, u jakim prasiŭ ab nieadkładnym razhladzie ŭsich padadzienych skarhaŭ. Spadziajusia, što ich razhledziać u terminovym paradku i situacyja budzie vypraŭlena, — skazaŭ abaronca.
Nijakich pracesualnych dziejańniaŭ ź Cichanoŭskim, pakul jon znachodzicca ŭ karcary, nie pravodziłasia.
Nahadajem, Siarhieja Cichanoŭskaha adpravili ŭ karcar 13 červienia. 20 červienia praciahnuli znachodžańnie ŭ karcary da 26 červienia.
