Heta vynikaje sa zvarota pravaabaroncy «Viasny» Alaksieja Łojki ŭ Hałoŭnaje ŭpraŭleńnie ŭłasnaj biaśpieki Ministerstva ŭnutranych spraŭ nakont pieravyšeńnia supracoŭnikami Hancavickaha RAUS svaich słužbovych paŭnamoctvaŭ.
20 červienia ŭ 20.40 kala adzialeńnia paštovaj suviazi ŭ Hancavičach na vulicy Kastryčnickaj była zatrymana miascovaja žycharka Ałła Kaleśnikovič. Žančyna maje niepaŭnahadovaje dzicia 2004 hoda naradžeńnia.
Zhodna z p. 1 č. 2 art. 8.4 Pracesualna-vykanaŭčaha kodeksa ab administracyjnych pravaparušeńniach na termin ad 3 da 72 hadzin moža być zatrymana asoba, kali jana zatrymana pa padazreńni ŭ ździajśnieńni pravaparušeńnia, za jakoje praduhledžany aryšt. Ale zhodna z č. 2 art. 6.7 Kodeksa ab administracyjnych pravaparušeńniach aryšt nie moža prymianiacca da žančyn, jakija majuć na ŭtrymańni niepaŭnahadovaje dzicia. Hetaja harantyja vynikaje z č. 1 art. 32 Kanstytucyi, zhodna ź jakoj instytut siamji znachodzicca pad abaronaj dziaržavy.
Pravaabaronca patrabuje nieadkładna vyzvalić žančynu i pryniać miery reahavańnia da supracoŭnikaŭ, jakija vyjšli za miežy svaich paŭnamoctvaŭ.
Nahadajem, što 20 červienia ŭ Hancavičach utvaryŭsia łancuh salidarnaści. Pa źviestkach žurnalista «Hancavickaha času», jaki vioŭ strym, zatrymana nie mienš za 10 čałaviek z vykarystańniem hrubaj fizičnaj siły. Kiravaŭ apieracyjaj padpałkoŭnik milicyi Vital Kulašoŭ. Zatrymany i źbity byli taksama žurnalisty «Hancavickaha času».
Čytajcie taksama: «Ivanyč, vyklučy hetuju ch…» Mać-pieramać milicyjanieraŭ u Hancavičach trapiła na videa. Internet kipić
U Hancavičach milicyjanier užyŭ taki samy pryjom, praź jaki ŭ ZŠA ŭspychli masavyja pratesty FOTAFAKT
