U piatnicu, 19 červienia, u apošni dzień zboru podpisaŭ, u mnohich haradach ludzi sabralisia ŭ łancuhi pratestu i salidarnaści.
U niekatorych haradach suprać pratestoŭcaŭ byŭ adpraŭleny AMAP.
Nie stała vyklučeńniem i Maładziečna. Na videa trapiŭ epizod, jak ludzi vyryvajuć u supracoŭnikaŭ milicyi zatrymanaha mirnaha demanstranta:
U niadzielu 21 červienia prajšła infarmacyja, što jak minimum adnaho z udzielnikaŭ sutyčki ŭžo zatrymała milicyja.
«Sprava zaviedzienaja pa č. 2 art. 363 Kryminalnaha kodeksa (supraciŭ supracoŭniku orhanaŭ unutranych spraŭ, spałučany z užyvańniem hvałtu), — paviedamlaje telehram-kanał Niechta. — Paciarpiełymi źjaŭlajucca supracoŭniki AMAP UUS Minabłvykankama Baranaŭ i Jakavienka. Padazravanyja: Pavieł Piaskoŭ i inšyja niavyznačanyja asoby».
«Naša Niva» adšukała znajomych Paŭła Piaskova. Jany paćvierdzili: mužčyna zatrymany.
Pavieł šturchaje amapaŭca
«Paśla hetaj sutyčki jon pajšoŭ u hości da znajomych. Tam zanačavaŭ. U subotu viartaŭsia dadomu, ale tak i nie dajšoŭ. Pa darozie jaho zatrymali, — kažuć znajomyja Piaskova. —
Pakul los Pašy nieviadomy, my nie viedajem, ni dzie jon, ni što jamu pradjaŭlajuć. Jon žyŭ u zdymnaj kvatery ź dziaŭčynaj. Jana ciapier taksama nie vychodzić na suviaź».
Piaskovu 31 hod. Jon mieŭ mikraaŭtobus, jaho pieryjadyčna najmali vytvorcy PVCH voknaŭ — Pavieł zajmaŭsia pieravozkaj i mantažom. «Zvyčajny narmalny mužyk», — charaktaryzujuć Piaskova znajomyja.
Pavieł Piaskoŭ.
Darečy, heta ŭžo nie pieršy raz, kali Pavieł vychodzić na vulicy vykazać pazicyju. U mai Piaskovu prysudzili 30 bazavych vieličyń štraf za «ŭdzieł u niesankcyjanavanym masavym mierapryjemstvie». Pryčynaj staŭ udzieł Paŭła ŭ sustrečy z błohieram Cichanoŭskim u krasaviku i ŭdzieł u tak zvanym «karmleńni hałuboŭ» 3 maja.
Ale ciapier usio našmat surjoźniej. Kali Piaskova sapraŭdy pryznajuć vinavatym u hvałcie ŭ dačynieńni da milicyjantaŭ, jamu pahražaje žorstkaje pakarańnie — da 5 hadoŭ pazbaŭleńnia voli.