Hramadski aktyvist Valeryj Rabcaŭ źbiraje hrošy, kab apłacić štrafy za ŭdzieł u akcyjach i pikiecie. Ahułam heta try štrafy pa 40 bazavych vieličyń.
«Sabrali ŭžo 625 rubloŭ. Zastałosia 1152 rubli, bo vystaŭlali 1777 rubloŭ», — patłumačyŭ «Našaj Nivie» Valeryj.
Pra zbor srodkaŭ Valeryj raskazaŭ na svajoj staroncy ŭ fejsbuku. Tam ža jon piša, što sudovyja prystavy nakłali aryšt na jaho bankaŭski rachunak, pahražajuć apisać majomaść u domie i navat zabrać jahonaje dzicia.
Na bankaŭski rachunak, akramia sabranych hrošaj, prychodzić dapamoha pa invalidnaści i piensija niepaŭnaletniaha syna Valeryja z II hrupaj invalidnaści, jakoha baćka vychoŭvaje adzin:
«28 maja sudovy prystaŭ zabłakavaŭ mnie kartku. Ja pytaŭsia: «Vy choć razumiejecie, što vy aryštavali?» U mianie dzicia ciapier siadzić bieź lekaŭ. Kali jany rabili zapyt u Minfin, jany musili ŭdakładnić, jakija hrošy lažać na kartcy i adkul jany iduć. Pry hetym, pa našaj damovie, ja mušu płacić 10 bazavych vieličyń štrafu za miesiac.
Tady sudovy prystaŭ niby «adstupiŭ» i razbłakavaŭ kartku, ale ja dahetul dakładna nie viedaju. Na ŭsio heta ja źbirajusia padavać u sud».
Štrafy aktyvist atrymaŭ za ŭdzieł u akcyi suprać intehracyi Biełarusi i Rasii i pikiecie na Kamaroŭcy 31 maja.
«Za akcyju za niezaležnaść krainy naprykancy 2019 hoda mnie dali dva štrafy pa 40 bazavych. Jašče adzin štraf dali za ŭdzieł u lehalnym pikiecie na Kamaroŭcy 31 maja. 5 červienia, kali ja vychodziŭ sa svajho doma, da mianie padyjšli dva čałavieki, pakazali paśviedčańni i skazali jechać ź imi. Ja admaŭlaŭ, ale jany pahražali artykułam 23.4 — niepadparadkavańnie supracoŭnikam milicyi. Ja pajechaŭ. Adsiadzieŭ troje sutak u CIP na Akreścina, potym mianie pryvieźli ŭ Zavadski sud. Moj syn u hety čas faktyčna byŭ adzin doma, tolki moj małodšy brat zachodziŭ jaho dahladać».
