U internecie praciahvajucca abmierkavańni nakont taho, kolki podpisaŭ u realnaści sabrali Hanna Kanapackaja, Andrej Dźmitryjeŭ i Siarhiej Čeračań.
Usie jany dekłarujuć, što sabrali nieabchodnyja dla rehistracyi 100 tysiač podpisaŭ. Ale zusim mała chto bačyŭ ichnich zborščykaŭ na vulicach haradoŭ na pikietach, a tym bolš — padčas pakvaternaha abychodu. Z hetaj pryčyny i ŭźnikajuć sumnievy ŭ praŭdzivaści źviestak.
Čytajcie taksama. Kaardynatar Kanapackaj: Sabrana nie bolš za 10 tysiač podpisaŭ
«NN» apytała niekalkich čałaviek, jakija źbirali podpisy za Siarhieja Čeračnia ŭ rehijonach, kab daviedacca nakolki ŭdała prachodziła ich praca.
Čym charakternaja asablivaść Čeračnia ad inšych kandydataŭ, što jon nie prosta abiacaje płacić hrošy zborščykam (pa 1 rubli za podpis), ale i vykonvaje abiacańnie svoječasova. Tamu jahonyja zborščyki ŭ asnoŭnym zadavolenyja supracaj i havorać pra svajho kandydata dobraje. U hetym ža jość i advarotny bok: zborščyki zacikaŭlenyja nazyvać bolšyja ličby, kab u vyniku mieć lepšaje ŭznaharodžańnie za svaju pracu.
Čytajcie taksama: Biznesmien-kamunist, jaki padabraŭ partyju Šuškieviča, sabraŭsia ŭ prezidenty. Što heta za frukt?
Čytajcie taksama. Kandydat u prezidenty Čeračań raspavioŭ, jak byŭ kamunistam, demakratam i aficyjantam u Krymie. Vialikaja hutarka
Čytajcie taksama. Daśviedčany zborščyk: Kanapackaja, Čeračań i Dźmitryjeŭ sabrali 1500-3000 podpisaŭ, nie bolš
Siarhiej Čeračań z prychilnicami. Fota Nadziei Bužan
Piatro Mihurski adkazvaŭ za zbor podpisaŭ za Siarhieja Čeračnia ŭ Mahilovie. Kaardynatar pryznajecca, što atrymałasia sabrać 1263 podpisy.
Padčas parłamienckaj kampanii-2019 u Mahilovie i rajonie było 324 819 vybarcaŭ. Ahułam pa ŭsioj krainie — 6 870 990 vybarcaŭ.
Heta značycca, što kali b pa ŭsioj Biełarusi źbirali podpisy ŭ tym ža tempie, što ŭ Mahilovie, u Čeračnia było b ahułam 26 716 podpisaŭ.
Mihurski taksama kaža pra 1108 podpisaŭ, jakija ŭdałosia sabrać na ŭschodzie Mahiloŭščyny — Chocimsk, Krasnapolle, Kryčaŭ…
Jon pryznajecca, što ŭ mnohich rajonnych centrach, takich jak Białyničy ci Bychaŭ, kamanda Čeračnia zmahła sabrać usiaho pa niekalki podpisaŭ.
Mihurski nie viedaje, kolki było sabrana, naprykład, u Babrujsku i Horkach, bo hetym zajmałasia zusim inšaja hrupa.
Aleh Filenia kaardynavaŭ zbor podpisaŭ za lidara «Hramady» ŭ častcy rajonaŭ Viciebska. Jon ściardžaje, što jahonaja kamanda zmahła sabrać 2500 podpisaŭ.
Piotr Kanstancinaŭ u Žłobinie nazyvaje ličbu 500-600 podpisaŭ. «Nu jak, za Čeračnia raśpisvalisia słabavacieńka. Za Cichanoŭskuju lepš. Za Cichanoŭskuju, nakolki viedaju, sabrali bolš za 2 tysiačy ŭ Žłobinie. Za Čeračnia źbirała podpisy tolki adna žančyna, jaje całkam chapała».
U Žłobinskim rajonie kala 75 tysiač vybarcaŭ. Kali b pa ŭsioj krainie było tak šmat prychilnikaŭ Čeračnia, jak tam, palityk sabraŭ by ahułam 45-55 tysiač podpisaŭ.
Natalla Hałanina z Bresta vychodziła ź pikietam za Čeračnia na ažyŭlenuju vulicu Savieckuju pa vychadnych. Kaža, što ŭ pieršy čas raśpisvalisia słaba, ale paśla pikieta ŭ padtrymku Cichanoŭskaj stała značna bolej achvotnych. Ahułam za stajańnie na pikiecie za niekalki vychadnych Hałanina zmahła sabrać kala 400 podpisaŭ.
Jana kaža, što realna za Čeračnia ŭ Breście źbirali 6-7 čałaviek. U asnoŭnym heta aktyvisty palityčnych partyj: sacyjał-demakraty i kamunisty sa «Spraviadlivaha śvietu».
Samuju nievierahodnuju ličbu nazvaŭ Vasil Bieraśnieŭ z Oršy. Pa jahonych słovach, tam u padtrymku Čeračnia ŭdałosia sabrać až 5000 podpisaŭ (ad 119 tysiač vybarcaŭ z Oršy i rajona). Vyhladaje zusim niepraŭdapadobna — pry takich tempach pa ŭsioj krainie ŭ Čeračnia ŭžo było b pad 300 tysiač podpisaŭ. Dla paraŭnańnia, pavodle infarmacyi «NN», štab našmat bolš papularnaha Valeryja Capkały padaŭ u Oršy 450 podpisaŭ.
Navat pa hetych ličbach možna zrabić peŭnyja vysnovy, ci atrymlivajecca ŭ Čeračnia ŭ realnaści sabrać nieabchodnyja 100 tysiač.
Čytajcie taksama: Vy vierycie, što Dźmitryjeŭ-Kanapackaja-Kisiel-Čeračań mahli sabrać pa 100 tysiač podpisaŭ?
