Dvoje členaŭ kamandy Hanny Kanapackaj na ŭmovach ananimnaści raskazali «Našaj Nivie» ab tym, jak iduć spravy. Svaje imiony jany nie nazyvajuć, bo praciahvajuć pracu ŭ štabie.
Hanna Kanapackaja zapeŭnivaje, što sabrała 100 tysiač podpisaŭ, fota z facebook.com.
«Nasamreč sabrana nie bolš za 10 tysiač podpisaŭ. A što vy chacieli? Tak robiać amal usie kandydaty», — kaža čałaviek, jaki pracuje rehijanalnym kaardynataram.
Pa słovach krynicy, zbor podpisaŭ za Kanapackuju byŭ spynieny jašče ŭ pačatku minułaha tydnia, choć aficyjna pretendentka śćviardžaje, što praca praciahvajecca pa siońnia.
«Usie pikiety źniatyja, abychod kvater taksama», — zapeŭnivaje krynica.
Druhaja krynica, pradstaŭnik inicyjatyŭnaj hrupy ŭ adnym z rajonnych centraŭ Viciebskaj vobłaści, paćvierdziła «Našaj Nivie», što sapraŭdy pastupiła kamanda spynić zbor. Naturalna, jana była vykananaja.
U kamandy Hanna Kanapackaj uźnikli pytańni pa apłacie pracy zborščykaŭ. Pa źviestkach «NN», pretendentka abiacała za kožny podpis pa $0,7. Jak kaža kaardynatar Kanapackaj, jana niejki čas admaŭlałasia raspłačvacca ź siabrami inicyjatyŭnaj hrupy, ale ŭ vyniku ŭsio ž addała hrošy.
Zrešty, čałaviek ź Viciebskaj vobłaści raskazaŭ, što Kanapackaja admoviłasia apłačvać pracu pikietaŭ, jakija išli pa asobnych rascenkach. U telehram-kanałach nazyvałasia ličba 20 rubloŭ za pikiet niezaležna ad kolkaści sabranych podpisaŭ.
Sama Kanapackaja kateharyčna admaŭlaje, što płacić zborščykam podpisaŭ. Pa jaje słovach, usia kamanda pracuje na dobraachvotnaj asnovie.
Jašče adzin važny momant: u inicyjatyŭnaj hrupy Hanny Kanapackaj paznačana ŭsiaho 12 kaardynataraŭ. Heta značyć, što mohuć uźniknuć prablemy z padačaj podpisaŭ u vybarčyja kamisii na miescach. Kanapackaja i jaje siastra Darja Truchanovič (kiraŭnica štaba) musiać abjechać minimum pa 67 kamisij, nie zakrytych kaardynatarami. Albo vykinuć u śmietnicu častku podpisaŭ.
Čytajcie taksama. Pravaabaroncy papiaredžvajuć: Cichanoŭskaja i Kanapackaja nie zmohuć zdać častku podpisaŭ
Kanapackaja raskazvaje pra palityku, zarobki i status seks-simvała apazicyi. Hutarka Ułada Šviadoviča
