Pra heta paviedamlajecca ŭ pres-relizie Nacbanka.
«U metach abarony intaresaŭ ŭkładčykaŭ i kredytoraŭ adkrytaha akcyjaniernaha tavarystva «Biełhazprambank» (AAT ˮBiełhazprambank»), niedapuščeńnia paharšeńnia jaho finansavaha stanu pastanovaj praŭleńnia Nacbanka ad 14 červienia pryniata rašeńnie ab uviadzieńni z 15 červienia časovaj administracyi pa kiravańni bankam», — havorycca ŭ pres-relizie.
Takaja miera pryniata na padstavie artykułaŭ 94, 97, 134, 134-1 Bankaŭskaha kodeksa Biełarusi z ulikam infarmacyi Kamiteta dziaržaŭnaha kantrolu ab zaviadzieńni Departamientam finansavych rasśledavańniaŭ u dačynieńni da słužbovych asob AAT «Biełhazprambank» kryminalnych spraŭ pa častcy 3 artykuła 235 «Lehalizacyja («admyvańnie») srodkaŭ, atrymanych złačynnym šlacham» i častcy 2 artykuła 243 «Uchileńnie ad vypłaty sum padatkaŭ (zboraŭ)» Kryminalnaha kodeksa Biełarusi.
Kiraŭnikom časovaj administracyi pa kiravańni AAT ˮBiełhazprambank» pryznačanaja Nadzieja Jermakova, jakaja ŭznačalvała Nacbank u 2011-2014 hadach i pakinuła pasadu, nie zdoleŭšy dać rady valutnamu kryzisu.
Paŭnamoctvy praŭleńnia AAT ˮBiełhazprambank» na pieryjad dziejańnia časovaj administracyi pa kiravańni bankam prypynienyja.
Nahadajem, što Biełhazprambank z 2000 pa maj 2020 hod uznačalvaŭ Viktar Babaryka, jaki kinuŭ vyklik Łukašenku na vybarach 2020 hoda. 12 maja Babaryka pakinuŭ pasadu kiraŭnika banka. V.a. staŭ Kirył Badziej.
11-13 červienia siłaviki abšukali hałaŭny ofis Biełhazprambanka i jaho rehijanalnuju sietku. U vyniku zatrymanyja 15 čałaviek, u tym liku namieśniki staršyni praŭleńnia banka.
Bolš za 99% akcyj Biełhazprambanka naležać rasijskim kampanijam: Hazpramu i Hazprambanku. U piatnicu Hazpram nazvaŭ dziejańni Biełarusi ŭ dačynieńni Biełhazprambanka niezakonnymi. Viktar Babaryka nazvaŭ padziei rejdarskim zachopam.
Pieratrusy ŭ Biełhazprombanku, mieniedžaram jakoha doŭhi čas byŭ Viktar Babaryka, i ŭ kampanijach siabroŭ Babaryki, adbylisia 11 červienia. Ni pra jakija pretenzii da hetych kampanij nie było viadoma, pakul hety bankir i miecenat nie zajaviŭ pra svaje prezidenckija ambicyi. Jon syšoŭ u adstaŭku z banka ŭ dzień, kali zajaviŭ pra svoj namier bałatavacca.
Sam Babaryka nazvaŭ dziejańni siłavikoŭ i zajavy Łukašenki ciskam na siabie.
«Usia maja dziejnaść, jakaja prachodziła na pasadzie kiraŭnika Biełhazprambanka ciaham 20 hadoŭ, nie vyklikała zaŭvah z boku pravaachoŭnych orhanaŭ, — skazaŭ jon 11 červienia. — My prachodzili ŭsie pravierki, u tym liku Nacbanka. Apošniaja — u studzieni. Ni razu pytańniaŭ nie było. Dziejańni siońniašniaha dnia nosiać zamoŭny charaktar», — skazaŭ jon.
Jon zaklikaŭ pravaachoŭnyja orhany trymacca zakonnaści.
«Ja čakaŭ cisku na mianie, i była infarmacyja, što ŭdar budzie pa mnie. Ale toje, što adbyłosia, pakazvaje, što suprać mianie ničoha niama. Ja hatovy da hetaha», — kaža Babaryka.
«Uvieś cynizm takich dziejańniaŭ u tym, što jany nakiravanyja nie na mianie, a nakiravanyja na maich siabroŭ i ludziej, ź jakimi ja pracavaŭ, — adznačyŭ pretendent na pasadu prezidenta ŭ svaim zvarocie. — Čamu heta zroblena? Bo pramoha kampramatu na mianie niama i ŭ ich jość vialikaja nadzieja, što ludziej zapałochajuć, prymusiać kazać niapraŭdu i ahavorvać druhich ludziej.
Ja mahu z dakładnaściu zajavić, što adzinymi pravilnymi pavodzinami i adkazam u hetaj situacyi, adkazam na hetaje biaźmiežža źjaŭlajecca praciah našaj baraćby.
Ja chaču źviarnucca da ŭsich tych, chto ŭžo padvierhsia dopytam, pieraśledam i vyklikam va ŭpaŭnavažanyja orhany.
Nie bojciesia kazać praŭdu. Nie kažycie chłuśniu, nie ahavorvajcie siabie i inšych ludziej. Kali treba, ja spadziajusia, što sumlennyja ludzi zaŭsiody akažuć vam dapamohu — jak jurydyčnuju, tak i materyjalnuju», — zajaviŭ Babaryka.
Ataki na Babaryku abvastryli tanalnaść jaho vystupaŭ.
«Samaja vialikaja pamyłka ŭ hetych dziejańniach ułady ŭ tym, što toj Biełarusi, jakaja była raniej i jakuju jany papichali jak svoj statak, bolš nie isnuje. Biełaruś pračnułasia. I ja chaču skazać, što novaja Biełaruś źmiacie reštki hetaha staroha režymu», — skazaŭ jon u videazvarocie.
Pieraśled kaleh Viktara Babaryki pačaŭsia, kali stała viadoma, što jaho inicyjatyŭnaja hrupa sabrała rekordnuju dla alternatyŭnaha kandydata kolkaść podpisaŭ — 335 001 pa stanie na siońnia.
Raniej maksimum — 217 tysiač — sabraŭ u 1994-m, jašče na svabodnych vybarach, Zianon Paźniak. U Alaksandra Milinkieviča ŭ 2006-m było 198 tysiač. U Siamiona Domaša ŭ 2001-m — 164 tysiačy.
Taksama i šerah apytańniaŭ pakazaŭ, što mienavita Viktar Babaryka moh by stać favarytam sumlennych vybaraŭ.
Babaryka sprabuje vybudavać šyrokuju antyłukašenkaŭskuju kaalicyju z udziełam samych roznych siłaŭ. Jaho kandydaturu padtrymała taksama nobieleŭskaja łaŭreatka Śviatłana Aleksijevič.
