Fota «Radyjo Svaboda»
Probašč kaścioła ŭ Ašmianach Jan Puzyna trapiŭ u špital z karanavirusam miesiac tamu. Užo dva tydni jon znachodzicca ŭ ciažkim stanie. Raniej jon paranoŭvaŭ karanavirus sa zvyčajnym hrypam, piša Hrodna.life.
«Užo bolš za dva tydni ksiondz Jan Puzyna znachodzicca na štučnaj vientylacyi lohkich (ŠVŁ), uviedzieny ŭ štučnuju komu. Lekary kažuć, što stan jaho zdaroŭja stabilna ciažki», — raskazaŭ Hrodna.life pres-sakratar Hrodzienskaj kuryi ksiondz Juryj Marcinovič.
Paśla špitalizacyi ksiandza Puzyny kaścioły ŭ ašmianskim dekanacie byli začynienyja na karancin: nie pravodzilisia publičnyja imšy i inšyja nabaženstvy z udziełam viernikaŭ. Kaścioły byli adkrytyja dla tych, chto choča indyvidualna pamalicca. Ciapier jany znoŭ adčynienyja dla ŭsich, słužby prachodziać u zvyčajnym režymie.
«Śviatary i vierniki, jakija naviedvajuć śviatyni, prytrymlivajucca ŭsich rekamiendacyj biskupa hrodzienskaha, a taksama miascovych uładaŭ i słužby achovy zdaroŭja», — raskazaŭ ksiondz Juryj Marcinovič. Pavodle jaho słovaŭ, usie katalickija śviatary ašmianskaha dekanatu zdarovyja i adčuvajuć siabie dobra.
Vialikija ŭračystaści ciapier nie arhanizujuć
Ksiondz Juryj ličyć, što situacyja z ksiandzom Janam paŭpłyvała na kaścioł. Usie śviatary i vierniki starajucca stroha zachoŭvać praviły hihijeny.
Va ŭsich parafijach ustrymlivajucca ad arhanizacyi relihijnych uračystaściaŭ i inšych mierapryjemstvaŭ ź vialikaj kolkaściu ŭdzielnikaŭ.
«U śviatyniach prachodziać tolki imšy, na jakich prysutničaje nie vielmi šmat ludziej. Ludzi zastajucca doma, šmat viernikaŭ udzielničaje ŭ niadzielnaj i śviatočnaj imšy anłajn. Usie dušpastyrskija akcyi i štohadovyja letnija inicyjatyvy pieraniesieny na paźniejšy čas. Pakul ciažka kazać pra kankretnyja daty».
