40-hadovy padpałkoŭnik Vajskovaj akademii Rusłan Ušakoŭ znachodzicca z karanavirusam u vajskovym špitali. Mužčyna ŭ ciažkim stanie, jaho padklučyli da aparata štučnaj vientylacyi lohkich.
Rodnyja i siabry apubličyli jaho historyju, kab znajści donaraŭ na płazmu II hrupy kryvi (rezus+). Emacyjny zvarot u instahramie błohierki Iryny Jabłonskaj (Kabasakał) atrymaŭ šmat pierapostaŭ. Rusłan Ušakoŭ davodzicca chrosnym baćkam dziciaci Jabłonskaj.
Adnak hetaja historyja nabyła niečakanuju prajekcyju paśla dopisa ŭ telehram-kanale Niechta. Siamju aficera razhniaviła, što vakoł jaje muža pačynajuć nakručvacca fejki.
«Šakuje toje, što adbyvajecca z padpałkoŭnikam Rusłanam Ušakovym […] — jon trapiŭ u balnicu 19 krasavika, […] kali žonka vajskoŭca źviarnułasia ŭ ŚMI, kab znajści donara płazmy, to davoli chutka na suviaź ź siamjoj vyjšła žančyna, čyja kroŭ by padyšła, ale […] pradstaŭniki Minabarony skazali, što patreby ŭ jaje kryvi niama, maŭlaŭ, siarod vajennych nichto chvareć nie moža, — paviedamlałasia ŭ papularnym telehram-kanale. — Siamju pačali zapałochvać i pahražać zvalnieńniem, doma ŭ mužčyny zastajecca žonka i dzieci, […] stanoŭčy vynik testa na COVID-19 i ŭ maci vajskoŭca», — śćviardžaŭ Niechta.
Ci moža takoje być, što Minabarony błakavała pieralivańnie kryvi aficeru?
«Naša Niva» źviazałasia z žonkaj Rusłana, Žannaj Ušakovaj.
Žančyna raźjušanaja — jana nie razumieje, adkul mahła ŭziacca takaja interpretacyja padziej.
«Ja nie viedaju, adkul heta ŭziałosia! U mianie niama [telehram] kanałaŭ hetych, ja tam nie zarehistravanaja, ja nie źviartałasia ŭ ŚMI. Tolki Iryna staviła ŭ svoj instahram zaklik zdać kroŭ dla płazmy, kab zaachvocić ludziej zdavać płazmu ŭ pryncypie. Bo bank ža ž tam ahulny, nielha zdać metava mienavita majmu mužu. Zajaŭka afarmlałasia ad vajskovaha špitala, i płazmu, ja dumaju, užo znajšli.
Ale ja ŭ šalenstvie, čytaju, što ŭ mamy majho muža stanoŭčy test na karanavirus… nu darujcie, ale jana ŭžo 14 hod lažyć u trunie, u jaje stanoŭčy test?! Nie viedaju, što jon skaža na heta, kali padymiecca.
Ja nie mahu skazać kiepskaha pra daktaroŭ, što na Rusłana plunuli, ci niešta takoje. Usie dapamahajuć! U špitali vielmi čułyja i dušeŭnyja ludzi, ja zaŭsiody mahu źviarnucca da daktaroŭ, spytać ab stanie svajho muža, ja viedaju, jak jon siabie adčuvaje ŭ luby momant, mnie kryŭdna, što takoje napisana. U jaho stanoŭčaja dynamika: daktary starajucca, i jon starajecca. Jon mocny mužyk.
Znoŭ ža, u špital jon trapiŭ nie 19 krasavika, jon tady jašče pracavaŭ i nie dumaŭ ni pra jakuju chvarobu, u špital jon trapiŭ 28-ha.
Sama ja adčuvaju siabie prymalna, tolki tempieratura skača tudy-siudy, siońnia ŭ mianie byŭ doktar, prapisaŭ antybijotyki, zaŭtra buduć rabić testy. Na tym tydni nie rabili, ja heta źviazvaju z tym, što byli vychodnyja».
Niama peŭnaści, što pieralivańnie płazmy ludziej, jakija vyzdaravieli ad COVID-19, dapamahaje, ale ŭ ciažkich vypadkach biełaruskija daktary iduć i na takuju terapiju. Jany zapazyčyli hetuju praktyku ad kitajskich kaleh.
Abviestki ŭ sacyjalnych sietkach pra pošuk donaraŭ płazmy majuć mała sensu. Reč u tym, što ludziej, jakija vyzdaravieli ad karanavirusa, pakul nie tak šmat, i baza źviestak pra ich i ichnyja hrupy kryvi jość u sansłužby. I miedyki sami metava źviartajucca da tych, čyja kroŭ moža vyratavać inšaha čałavieka. Zrešty, ludziej u sacsietkach, jak i Irynu Jabłonskuju, možna zrazumieć. Tak jany sprabujuć vykazać svaju salidarnaść i spahadu z tymi, kaho začapiła pandemija.
