Padrychtoŭka da «Vienskaha balu z A1 u Kupałaŭskim» u samym razhary. Kab na adnu noč Minsk pieratvaryŭsia ŭ Vienu, arhanizataraŭ śviata — kampaniju A1 i Nacyjanalny akademičny teatr imia Janki Kupały pry padtrymcy pasolstva Aŭstryi ŭ Biełarusi — čakaje šmat raboty. Niekatoryja siurpryzy, padrychtavanyja imi dla haściej i ŭdzielnikaŭ śviata, stali viadomyja ŭžo zaraz.
«Vienski bal z A1 u Kupałaŭskim» adbudziecca 14 śniežnia. Na adnu noč hałoŭnaja zała kardynalna źmienicca: z hladzielnaj pieratvorycca ŭ balnuju. Dla hetaha parter zały budzie vyzvaleny ad kresłaŭ, a padłoha z dapamohaj śpiecyjalna raspracavanaj kanstrukcyi budzie ŭźniata na adzin uzrovień sa scenaj, kab stvaryć roŭnuju pavierchniu, prydatnuju dla tancaŭ. Da taho ž ahulnaja płošča pamiaškańnia budzie značna pavialičana za košt prastory sceny, kab kožnamu sa šmatlikich haściej balu było kamfortna.
Pieršymi, chto stupić na parkiet transfarmiravanaj hladzielnaj zały Hałoŭnaj sceny Kupałaŭskaha teatra, buduć 20 par debiutantaŭ. Hetych maładych ludziej i dziaŭčat balny kamitet adbiare z bolš jak 200 udzielnikaŭ vočnaha etapa kastynhu. K cyrymonii adkryćcia «Vienskaha balu z A1 u Kupałaŭskim» ich padrychtuje prafiesar Tomas Šefier-Elmajer, jaki sa svajoj viadomaj va ŭsim śviecie tancavalnaj škołaj «Elmajer» adkazvaje za praviadzieńnie padobnych cyrymonij na mnohich znakamitych balach Vieny. Prafiesar śpiecyjalna prybudzie ŭ Minsk z Aŭstryi.
Tancavalnaja dynastyja Elmajer užo 100 hadoŭ kiruje adnajmiennaj škołaj tancaŭ u Vienie — papularnaj nie tolki siarod žycharoŭ aŭstryjskaj stalicy, ale i va ŭsioj krainie. Jaje zasnavaŭ były vajenny aficer Vili Elmajer-Viestenbruh, dzied Tomasa Šefier-Elmajera.
Na praciahu 27 hadoŭ škoła Elmajer staviła chareahrafiju dla Opiernaha balu ŭ Vienie, a siońnia praciahvaje rychtavać debiutantaŭ dla mnostva vienskich balaŭ — Fiłarmaničnaha, Balu aficeraŭ, Balu palaŭničych, Balu uładalnikaŭ vienskich kaviarniaŭ, Bała jurystaŭ i inš. (usiaho kala 50 cyrymonij adkryćcia balaŭ za hod). Prafiesar Tomas Šefier-Elmajer vydaŭ 9 knih, pryśviečanych etykietu, a taksama vystupaje ŭ jakaści koŭča i biźnies-treniera. Vialikaj papularnaściu karystajucca jaho lekcyi pa etykiecie.
«Vienskija valsy i vienskija bali — adny z samych znakamitych simvałaŭ Aŭstryi, viadomych va ŭsim śviecie. I vielmi pryjemna, što jany karystajucca cikavaściu i ŭ Biełarusi — krainie, jakaja i sama moža hanarycca svaim ŭnioskam u jeŭrapiejskuju kulturu i historyju. Dla mianie było vialikim zadavalnieńniem nie tolki daviedacca, što ŭ hetym hodzie pieršy vienski bal adbudziecca ŭ Minsku. Ź nie mienšym zadavalnieńniem ja hatovy dapamahčy arhanizataram «Vienskaha balu z A1 u Kupałaŭskim» u padrychtoŭcy debiutantaŭ da hetaj padziei. Rola debiutanta — adna z samych pryhožych i adkaznych na kožnym vienskim bali, i ja ŭpeŭnieny, što minskaja moładź spravicca ź joju na «vydatna», — adznačyŭ prafiesar Tomas Šefier-Elmajer.
14 śniežnia debiutanty adkryjuć «Vienski bal z A1 u Kupałaŭskim» uračystym šeściem. U jakaści muzyčnaha supravadžeńnia prahučyć znakamity pałanez Ahinskaha («Raźvitańnie z Radzimaj»). Vychad debiutantaŭ adbudziecca pad akampaniemient Dziaržaŭnaha akademičnaha simfaničnaha arkiestra Respubliki Biełaruś. Mienavita hety kalektyŭ budzie ihrać znakamityja valsy, polki, mazurki i inšyja miełodyi, pad jakija na priaciahu ŭsioj nočy buduć tancavać hości balu.
Stać udzielnikam «Vienskaha balu z A1 u Kupałaŭskim» moža kožny žadajučy pry vykanańni niekalkich nieabchodnych umoŭ. Pa-pieršaje, treba nabyć bilet (dakładnaja infarmacyja ab ich prodažy źjavicca naprykancy kastryčnika; nahadajem taksama, što 50% vyručanych srodkaŭ buduć nakiravany na dapamohu hramadskaj arhanizacyi «SOS-dziciačyja vioski Biełaruś»). Pa-druhoje, prytrymlivacca zaćvierdžanaha arhanizatarami dres-kodu: Black Tie dla mužčyn — i heta patrabavańnie źjaŭlajecca abaviazkovym dla ŭsich haściej viečara.
«Vienski bal z A1 u Kupałaŭskim» možna budzie ŭbačyć i biaspłatna: padzieja budzie tranśliravacca ŭ žyvym efiry na płatformie VOKA.
