Pra heta Papa Francišak zajaviŭ, źviartajučysia da supolnaści cyhanoŭ u Rumynii, dzie jon znachodzicca ź vizitam, paviedamlaje Radyjo Vatykana.
Z pradstaŭnikami cyhanskaj supolnaści Papa sustreŭsia ŭviečary 2 červienia, padčas naviedvańnia staražytnaha cyhanskaha kvartała Barbu-Łeŭtaru ŭ horadzie Błaž.
Pantyfik źviarnuŭsia da prysutnych z pramovaj, u jakoj, pierš za ŭsio, pieraprasiŭ ad imia Kaścioła za ŭcisk i dyskryminacyju, jakim na praciahu historyi padviarhalisia cyhany.
«Niasu ciažar u sercy, — pryznaŭsia Papa. — Heta ciažar dyskryminacyj, siehrehacyj i drennaha abychodžańnia, źviedanych vašymi supolnaściami. Historyja kaža nam, što i chryścijanie, u tym liku katoliki, nie zastalisia ŭ baku ad hetaha zła».
«Ad imia Kaścioła ja prašu prabačeńnia ŭ Pana i ŭ vas za ŭsie vypadki, kali na praciahu historyi my dyskryminavali vas, drenna z vami abychodzilisia abo hladzieli na vas pamyłkova — pozirkam Kaina, a nie Abela, i nie zdoleli spaznać adzin adnaho, acanić i abaranić vas u vašaj admietnaści», — skazaŭ Francišak.
