Cieła 22-hadovaha pamočnika prakurora Butyrskaha mižrajonnaha prakurora (Maskva, Rasija) Dźmitryja Niakrasava znajšli 9 maja. Mužčyna byŭ u svajoj chacie, u kajdankach i z halštukam u rocie. Paźniej vyśvietliłasia, što ŭ žyćci maładziona žorstki seks i narkotyki byli šarahovaj źjavaj.
Dźmitry Niakrasaŭ
Pačałosia rasśledavańnie. Stała viadoma, što Niakrasaŭ byŭ hiejem, jaki zachaplaŭsia BDSM. Pieršapačatkovaj viersijaj i była śmierć padčas seks-hulniaŭ. Śledčyja znajšli navat kachanka Niakrasava (jaki, darečy, taksama akazaŭsia rabotnikam prakuratury), ale jon, zdajecca, nie byŭ datyčny da historyi.
Taksama vyśvietliłasia, što pamočnik prakurora nie hrebavaŭ i narkotykami. Susiedzi raspaviadali, što mužčyna niaredka ładziŭ doma hiej-orhii, vyklikajučy prastytutak mužčynskaha połu.
Telehram-kanał MASH paviedamlaje, što prablemy iduć ź dziacinstva Niakrasava. Jaho nibyta zhvałtavali va ŭzroście 11 hadoŭ u carkoŭna-prychodskaj škole, raspaviała jaho maci.
Praź niekalki dzion zatrymali adnaho z dvuch padazravanych u zabojstvie Niakrasava. Hledziačy pa ŭsim, pamočniku prakurora sapraŭdy paabiacali cikavy seks, ale skončyłasia ŭsio zusim nie orhijaj.
Śledčyja ličać, što Andrej Hłuchich i Maksim Łuniehaŭ ź Piermi byli «śpiecyjalistami» pa seks-mienšaściach. Znajomilisia ŭ internecie, prychodzili ŭ hości i rabavali — u apošni raz zadušyli jakraz pamočnika prakurora. Potym zabojcy sprabavali insceniravać śmierć u vyniku uciech, ściahnuli ŭsio adnosna kaštoŭnaje (elektronnyja cyharety, nout, kurtki, pinžaki, butelku viski i trochi hrošaj) i źbiehli. Ale nie nadta paśpiachova. Łuniehaŭ va ŭciokach, Hłuchich u rukach palicyi — jaho čakaje sud i łahiernaja ramantyka.
