Aŭkcyjon na prava zabudovy ŭčastka ŭ 0,43 hiektara na Internacyjanalnaj prachodziŭ na minułym tydni. Na ziamlu pretendavali minimum siem udzielnikaŭ. Aŭkcyjon vyjhrała kampanija «VilniusStroj», prapanavaŭšy sumu ŭ 4,5 miljona rubloŭ (u 16 razoŭ bolš pačatkovha koštu), paviedamili infarmavanyja krynicy. U «VilniusStroje» nie stali admaŭlać hetuju infarmacyju, ale bolš poŭny kamientar kampanii apieratyŭna atrymać nie ŭdałosia.
Fota: investatlas.minsk.gov.b
Pa ŭmovach aŭkcyjonu na ŭčastku treba pabudavać hramadski centr płoščaj da 10 tysiač kvadratnych mietraŭ. Nie mienš za 35% pavinna zajmać kulturna-zabaŭlalnaja častka, jašče nie mienš za 35% — handlova-bytavaja, nie bolš za 30% — padziemny parkinh.
Adznačym, što pobač — na skryžavańni Vaładarskaha i Haradskoha Vała — kampanija «VilniusStrojInviest» płanuje budaŭnictva hatela.
Miarkujecca, što hatel budzie takim. Fota z sajta minsknews.by
«VilniusStroj» isnuje z 2010 hoda. Jana viadomaja ŭ pieršuju čarhu jak zabudoŭščyk ŽK «Staličny» na Cimirazieva. Dyrektaram struktury źjaŭlajecca Mikałaj Jakałcevič. Na sajcie Prezidenckaha spartyŭnaha kłuba jon značycca hulcom amatarskaj chakiejnaj kamandy «Mif-Siem pahorkaŭ». U joj u tym liku hulajuć byłyja zorki biełaruskaha chakieja — Siarhiej Staś, Alaksandr Radzinski i Dźmitryj Pankoŭ. A raniej za hetuju kamandu razam ź Jakałcevičam vystupaŭ i Dźmitryj Baskaŭ — hiendyrektar minskaha «Dynama» i trenier «Hryfonaŭ», za jakich hulaje Mikałaj Łukašenka.
