11 studzienia ŭ Breście abviaścili prysud 34-hadovamu rasijaninu, jaki abvinavačvaŭsia ŭ niezakonnym zachoŭvańni, pieravozcy i pieramiaščeńni praź miažu kakainu.
Letaś pradprymalnik z Rasii, jaki pražyvaje ŭ Maskoŭskaj vobłaści, adpačyvaŭ u adnoj z krain Jeŭrasajuza. Dadomu viartaŭsia na asabistym aŭtamabili praz punkt propusku «Brest» na polska-biełaruskaj miažy. Padčas nadhladu ŭ jaho znajšli krychu bolš adnoj sotaj hrama kakainu. Mužčynu zatrymali i raspačali kryminalnuju spravu.
U sudzie abvinavačvany svaju vinu pryznaŭ. Jon paviedamiŭ, što za miažoj užyvaŭ narkotyki i pierad pierasiačeńniem miažy «zabyŭsia vykinuć» reštki.
Abvinavačanamu pryznačyli piać hadoŭ pazbaŭleńnia voli ŭ kałonii ŭzmocnienaha režymu. Aŭtamabil koštam bolš za 39 tysiač biełaruskich rubloŭ kanfiskavany.
Prysud nie ŭvajšoŭ u zakonnuju siłu i moža być abskardžany.