Litva zacikaŭlenaja ŭ tym, kab Biełaruś zachavała niezaležnaść jak maha daŭžej. Pra heta zajaviŭ ministr zamiežnych spraŭ Litvy Linas Linkiavičus padčas «Śniežnaj sustrečy» ekśpiertaŭ pa biaśpiecy, jakaja prajšła 10-11 studzienia ŭ Trakajskim rajonie Litvy, piša Delfi.
Na pytańnie ab tym, jak jon aceńvaje situacyju ŭ Biełarusi ŭ suviazi z aktualizacyjaj pytańnia ab intehracyi jaje z Rasijaj u apošni čas, Linas Linkiavičus adznačyŭ, što čym dalej, tym bolš Biełaruś intehrujecca ŭ Rasiju.
«Ciapier uvieś čas uźnimajecca pytańnie pra ažyćciaŭleńnie płanaŭ pa stvareńni Sajuznaj dziaržavy, i nam heta asabliva aktualna, bo my viedajem intencyi Rasii, jaje vajennuju stratehiju, niedružalubnaje, varožaje staŭleńnie, admaŭleńnie kaštoŭnaściaŭ. Skaračeńnie kolkaści elemientaŭ suvierenitetu Biełarusi — heta sapraŭdy niespryjalny praces. My zacikaŭleny ŭ tym, kab Biełaruś jak maha daŭžej zachoŭvała suvierenitet. Jak heta adbudziecca i jakim sposabam, vyrašać, napeŭna, nie nam», — skazaŭ ministr.
Na dumku Linasa Linkiavičusa, stupień biełaruska-rasijskaj intehracyi na hetym etapie prailustravali rasijska-biełaruskija vučeńni «Zachad-2017»: «Heta pakazała, nakolki mocna intehravanaja Biełaruś va ŭsie struktury Rasijskaj Fiederacyi, asabliva što tyčycca abarony i biaśpieki. Tak što tak nam i varta heta traktavać».
