Foto: censor.net.ua
Najbolšyja straty (35%) ad ahniu snajpieraŭ i kulamiotaŭ. Supastaŭnyja straty ad ahniu minamiotaŭ, artyleryi, RPH, harmat BMP (32%). Na trecim miescy — padryŭ na minach (20%).
Uvohule, hetaja statystyka blizkaja da strat u zaciažnych łakalnych kanfliktach pa ŭsim śviecie. U svoj čas nad prablemaj pracavali ZŠA. Pieršyja straty abumoŭleny doŭhim znachodžańniem vajskoŭcaŭ na adnoj pazicyi, što pryvodzić da rezkaha źnižeńnia pilnaści (čym karystajucca snajpiery, raźvied- i ŭdarnyja hrupy praciŭnika). Šmat u čym dla hetaha była ŭviedziena ratacyja vajennaha kantynhientu ZŠA ŭ adnoj miascovaści praz paŭhoda.
Straty ad artyleryi nie tolki ŭ łakalnych, ale i ŭ maštabnych vojnach adny z najbolšych. Tut rašeńnie idealnaje nie znojdziena: sprabavali raspracoŭvać bronieasnaščeńnie sałdata z abaronaj ad askiepkaŭ, šlemy sa źnižeńniem ryzyki kantuzii i inš. Ale vybuch štuka surjoznaja i abaranić sałdata składana (pry ŭmovie što jon pavinien efiektyŭna vykonvać uskładzienyja na jaho zadačy).
Što tyčycca strat ad min (i šyrej — ad samarobnych vybuchovych pryład), to ZŠA ŭ svoj čas (Irak, Afhanistan) vydatkavali kala 6,4 młrd. dołaraŭ ZŠA na raspracoŭku techniki dla vyjaŭleńnia i raźminiravańnia, a taksama kompleksaŭ abarony ad min. Uvohule, hrošy tam vydatkavanyja niezdarma. U vypadku Ukrainy sprava, vierahodna (dakładna možna skazać majučy detalovyja dadzienyja), nie ŭ stratach na svajoj terytoryi, a pry viadzieńni vyviedki, šturmie i inš. — chutčej za ŭsio na minnych palach i zaharodžańniach praciŭnika, a takija straty praduchilić składaniej, pakolki techniku dystancyjnaha vyjaŭleńnia z saboj nie paciahaješ (asabliva, kali jaje niama). Kali heta straty nie pry šturmach, a na svajoj terytoryi (svaje zabytyja minnyja pali, miny-pastki na trasach i da t.p.), to šmat u čym takija straty źnižajucca dobrym abstalavańniem dla vyjaŭleńnia i raźminiravańnia, a taksama dyscyplinaj asabovaha składu na maršach i pry abychodžańni z padazronymi pradmietami.
Asobna ŭ takich statystykach varta razhladać śmierć u špitali. U pryviedzienaj statystycy — heta kala 1%. Časam, kab puścić pyłu ŭ vočy, maŭlaŭ, «jakaja dobraja ŭ nas miedycyna», padajuć taki nizki pracent jak dasiahnieńnie miedycyny. Ale tut zaŭsiody treba viedać detali, pakolki nizki pracent ahulnych strat u špitali moža śviedčyć ab drennym akazańni pieršaj dapamohi, drennych mahčymaściach evakuacyi paranienaha z pola boju ŭ špital i da t.p. (h.zn. paranienyja pamirajuć na pole boju). Jakaść miedycyny varta aceńvać pa suadnosinach pamiž pamierłymi i tymi, chto pastupiŭ paranienym, a nie pa pracentu ahulnych strat.
