pixabay.com
Čorny śpis resursaŭ stanie jašče bolš zakrytym, a razbłakiroŭka sajta moža ŭskładnicca. Heta vynikaje z abnoŭlenaha paradku błakavańnia i razbłakiroŭki sajtaŭ, apublikavanaha na Nacyjanalnym pravavym internet-partale.
Dakumient nazyvajecca «Pałažeńnie ab paradku abmiežavańnia (adnaŭleńnia) dostupu da internet-resursu». Jaho zaćvierdzili Apieratyŭna-analityčny centr pry prezidencie, Ministerstva suviazi i infarmatyzacyi i Ministerstva infarmacyi. Pastanova ŭstupaje ŭ siłu z 1 śniežnia 2018 hoda.
Raniej paradak błakavańnia vyznačaŭ anałahičny dakumient, pryniaty ŭ 2015 hodzie. U novaj viersii źmianiłasia ŭsiaho niekalki momantaŭ.
Čorny śpis staŭ jašče bolš zakrytym
Śpis sajtaŭ, jakija padlahajuć błakavańniu, viadzie Dziaržaŭnaja inśpiekcyja pa elektrasuviazi (BiełDIE). Hety śpis składajuć na padstavie rašeńniaŭ Ministerstva infarmacyi. Pravajdary rehularna praviarajuć śpis i błakujuć usie resursy ź jaho.
Śpis hety zakryty, bačyć jaho mohuć tolki pravajdary, čynoŭniki i siłaviki. Raniej dostup da śpisu mahli atrymać «inšyja dziaržaŭnyja orhany i arhanizacyi ŭ adpaviednaści ź ich kampietencyjaj, vyznačanaj zakanadaŭstvam» pa ŭzhadnieńni z profilnymi viedamstvami.
Zaraz hetuju farmuloŭku prybrali. Pahladzieć śpis mohuć tolki supracoŭniki Ministerstva infarmacyi, Ministerstva suviazi i infarmatyzacyi, orhanaŭ, jakija ažyćciaŭlajuć apieratyŭna-vyšukovuju dziejnaść, orhanaŭ prakuratury i papiaredniaha śledstva, orhanaŭ Kamiteta dziaržaŭnaha kantrolu, padatkovych orhanaŭ, sudoŭ i pastaŭščykoŭ internet-pasłuh.
Kolkaść skaržnikaŭ abmiežavali
«Inšyja asoby» źnikli i sa śpisu tych, chto moža paskardzicca na sajty z zabaronienaj infarmacyjaj, jakija znajšli ŭ internecie.
Raniej zrabić heta mahli «inšyja dziaržaŭnyja orhany i arhanizacyi ŭ adpaviednaści ź ich kampietencyjaj, vyznačanaj zakanadaŭstvam», a jašče «inšyja arhanizacyi» i fizičnyja asoby. Pa sutnaści, na znojdzienuju ŭ Sietcy zabaronienuju infarmacyju moh paskardzicca chto zaŭhodna. Da prykładu, internet-encykłapiedyju «Łurkamorje» u Biełarusi błakavali pa zvarocie z Nacyjanalnaj biblijateki Biełarusi.
U abnoŭlenym dakumiencie hetaha punkta bolš niama. Rašeńnie ab błakavańni prymaje Mininfarm (jak i raniej). Dadavać novyja punkty ŭ śpis moža i BiełDIE, ale tolki srodki abychodu błakavańniaŭ - naprykład, «ananimnyja sietki typu Tor».
Jak razbłakavać sajt?
U minułaj viersii dakumienta byŭ ałharytm dziejańniaŭ dla ŭładalnika zabłakavanaha sajta, kali jon znachodzicca ŭ nacyjanalnym siehmiencie internetu.
Uładalnik mieŭ prava piśmova źviarnucca ŭ Ministerstva infarmacyi z zajavaj ab adnaŭleńni dostupu. Ministerstva było abaviazana na praciahu miesiaca z dnia atrymańnia zajavy pravieryć, što parušeńni likvidavany. Kali jany sapraŭdy byli likvidavany, viedamstva prymała rašeńnie ab adnaŭleńni dostupu i sajt razbłakavali.
Bolš takoj instrukcyi niama. Mahčymaść razbłakoŭki ŭsio jašče praduhledžana, ale tolki pa rašeńni Ministerstva infarmacyi - biez udakładnieńnia paradku i terminaŭ razhladu zajavy.
