U Babrujsku zabili dźviuch žančyn, adna ź jakich paśpieła paviedamić pra niebiaśpieku ŭ milicyju, padazravany zatrymany, paviedamlaje UUS Mahiloŭskaha abłvykankama.
Kala 7.00 20 lipienia ŭ apieratyŭna-dziažurnuju słužbu UUS patelefanavała žančyna i paprasiła joj dapamahčy. Jany razam ź siabroŭkaj začynilisia ŭ vannym pakoi kvatery, kudy sprabavaŭ prakraścisia nieviadomy. Dakładnaha adrasa jana nie nazvała, skazaŭšy tolki numar kvatery. Jak paźniej vyśvietliłasia — pamyłkovy.
Asabovy skład UUS padniali pa tryvozie. Supracoŭniki praviarali ŭsie šmatkvaternyja žyłyja damy pa vulicy Łyńkova i terytoryi, što miažuje, praviaralisia zabaŭlalnyja ŭstanovy, vyvučali zapisy kamier videanazirańnia.
Akazałasia, što 26-hadovaja babrujčanka i jaje 27-hadovaja znajomaja adpačyvali ŭ kafe, dzie paznajomilisia ź nieviadomym mužčynam, ź jakim jany potym źjechali na taksi. Supracoŭniki kryminalnaha vyšuku vyznačyli mužčynu, ź jakim bačyli hetych dziaŭčat. Heta byŭ nieadnarazova sudzimy 36-hadovy babrujčanin, jaki nidzie nie pracavaŭ. Nieŭzabavie jaho zatrymali.
U vannym pakoi kvatery zatrymanaha znajšli trupy dźviuch dziaŭčat sa śladami hvałtoŭnaj śmierci. Adna ź ich paśpieła patelefanavać u milicyju ŭ momant niebiaśpieki.
Padazravanamu pahražaje śmiarotnaje pakarańnie.
