U piatnicu 6 lipienia paśla pasiadžeńnia ŭ sudzie Leninskaha rajona Bresta aktyvisty praviali fłešmob. Jany padniali ŭvierch arkušy, na jakich byli razdrukavany fotakopii karciny niderłandskaha mastaka Davida Hierarda «Sud Kambisa», na jakoj z pradažnaha sudździ ździrajuć skuru. Karcina była napisana dla zały sudovych pasiadžeńniaŭ u ratušy Bruhie i była zaklikanaja nahadvać pra nieabchodnaść sudzić spraviadliva, paviedamlaje Bresckaja hazieta.
Akramia taho, udzielniki fłešmobu skłali skarhi na imia staršyni suda z prośbaj pravieści pravierku dziejańniaŭ sudździ.
Fłešmob pačaŭsia paśla razhladu administracyjnych spraŭ u dačynieńni da Dźmitryja Biekaluka i Aleha Jarmolenki. Ich pryciahvajuć da administracyjnaj adkaznaści za zbor podpisaŭ za adstaŭku kiraŭnictva Bresta, Bresckaha rajona i Bresckaj vobłaści ŭ suviazi sa strataj davieru. Pravaachoŭniki paličyli heta niesankcyjanavanym masavym mierapryjemstvam (artykuł 23.34 KaAP RB).
Dźmitryj Biekaluk chadajničaŭ pra vyklik u sud śviedak u asobie supracoŭnikaŭ milicyi, jakija zapisvali zatrymańnie, a taksama pra vypatrabavańnie videazapisaŭ, zroblenych imi, dla abjektyŭnaha razhladu spravy. Sudździa Śviatasłaŭ Kalina admoviŭ u zadavalnieńni chadajnictva. Razhlad hetaj spravy, jak i spravy Aleha Jarmolenki, praciahniecca 11 lipienia z udziełam advakataŭ.
Alaksandr Kabanaŭ, Dźmitryj Biekaluk i Aleh Jarmolenka ŭ sudzie (źleva naprava).
