U Rečyckim rajonie kałodziežnaj vadoj atruciłasia niemaŭla. Jak vyśvietlili paźniej śpiecyjalisty, uzrovień ŭtrymańnia nitrataŭ u vadzie apynuŭsia ŭ 33 razy vyšej za normu, piša Tut.by sa spasyłkaj na hazietu «Dnieproviec».
Incydent adbyŭsia jašče ŭ śniežni minułaha hoda. U reanimacyju Homielskaj abłasnoj balnicy ŭ ciažkim stanie dastavili miesiačnaje niemaŭla z Rečyckaha rajona. U dziciaci byli zafiksavanyja simptomy miethieahłabiniemii (chvaroby, jakaja charaktaryzujecca źnižeńniem zdolnaści kryvi pieranosić kisłarod u vyniku skaračeńnia ŭzroŭniu narmalnaha hiemahłabinu). Na ščaście, niemaŭla ŭdałosia vyratavać.
Stali vyśviatlać pryčynu. Akazałasia, što mama dziciaci na vadzie sa zvyčajnaha kałodzieža pryhatavała dziciačuju sumieś.
Śpiecyjalisty pravieryli vadu i žachnulisia — utrymańnie nitrataŭ u joj było ŭ 33 razy vyšej za normu. Kałodziež tut ža zakryli, raspaviała zahadčyk adździaleńnia kamunalnaj hihijeny Rečyckaha ZCHiE Alina Muraška.
