Fota Siarhieja Hudzilina
Abvinavačvańnie zapytała dla minčuka Śviatasłava Baranoviča, jaki ŭdaryŭ milicyjanta paśla «Maršu niedarmajedaŭ» uviesnu 2017 hoda, 4 hady pazbaŭleńnia voli z adbyvańniem pakarańnia ŭ kałonii ahulnaha režymu.
U sudzie Maskoŭskaha rajona Minska praciahvajecca sud nad Śviatasłavam Baranovičam, jakoha abvinavačvajuć u hvałcie ŭ dačynieńni da supracoŭnika ŭnutranych orhanaŭ. Jamu pahražaje abmiežavańnie voli na termin da 5 hadoŭ abo pazbaŭleńnie voli na termin da 6 hadoŭ.
Nahadajem, incydent adbyŭsia 15 sakavika minułaha hoda paśla sankcyjanavanaha «Marša niedarmajedaŭ» u Minsku. Baranovič sprabavaŭ «adbić» u milicyjantaŭ u cyvilnym ludziej, jakich zatrymlivali ŭ tralejbusie № 37 na prypynku «Płošča Banhałor», siarod jakich byli i anarchisty, jakija ŭdzielničali ŭ akcyi, i zvyčajnyja pasažyry. Samoha Baranoviča zatrymali tolki praz paŭhoda — 3 kastryčnika. Z tych časoŭ jon znachodziŭsia ŭ SIZA № 1 Minska.
Padčas pieršaha pasiadžeńnia Baranovič pryznaŭ siabie vinavatym. Paciarpieły milicyjant Arciom Paŭłaŭ zajaviŭ u sudzie, što ciapier pretenzij da abvinavačanaha nie maje, u tym liku maralnych.
Siońnia sud pryniaŭ rašeńnie abviaścić pakazańni Baranoviča z-za najaŭnaści supiarečnaściaŭ.
«Baranovič pakazaŭ, što nie pamiataje padziejaŭ 15 sakavika 2017, a taksama, dzie jon u hety dzień znachodziŭsia. U chodzie dopytu 5 kastryčnika 2017 hoda abvinavačvany pakazaŭ, što ŭ «pakazanym miescy ŭ hety čas nie prysutničaŭ, napeŭna, nie pamiataju. Udary nie nanosiŭ». U ramkach dopytu paźniej abvinavačany dapuściŭ fakt svajho ŭdziełu ŭ mierapryjemstvach 15 sakavika 2017 i naniasieńnia svaich udaraŭ. Pažadaŭ dać pakazańni i pakazać svaju pazicyju, ukazaŭ ab pryznańni viny. Pakazańni vyrašyŭ davać paśla źmieny advakata. 22 śniežnia 2017 hoda padčas dopytu ŭ prysutnaści abaroncy ŭkazaŭ ab pryznańni viny i što ŭdary supracoŭniku nanios, bo nie chacieŭ, kab jon zatrymlivaŭ anarchistaŭ. Ja zrazumieŭ, što chłopiec pierada mnoj mieŭ prykmiety milicyjanta, bo jon byŭ spartyŭnaha ciełaskładu, u ciomna-siniaj kurtcy z kapiušonam, jaki zakryvaŭ pałovu jaho tvaru. I paśla naviedvańnia padobnych akcyj i mitynhaŭ ja navučyŭsia paznavać milicyjantaŭ u cyvilnym», — začytała śviedčańni dopytaŭ sudździa.
— Paćviardžaju hetyja pakazańni, — skazaŭ u sudzie Baranovič.
U sudzie pačalisia sudovyja sprečki. Spačatku słova było dadziena dziaržabvinavaŭcu Valeryju Sierhijenku.
— Baranoviču było pradjaŭlena abvinavačvańnie ŭ tym, što jon 15 sakavika, z 19 da 19.30 hadzin, nanios supracoŭniku ŭnutranych spraŭ ŭdary roznymi častkami cieła. Prašu sud vynieści abvinavaŭčy prysud. Budučy dapytanym, Baranovič svaju vinu całkam pryznaŭ, pryznaŭ, što nanosiŭ udary i ŭśviedamlaŭ, što pierad im supracoŭnik unutranych spraŭ, ŭ zroblenym raskajvajecca, — skazała prakuror. — abciažvajučymi abstavinami prašu ličyć nieadnarazovaje pryciahnieńnie abvinavačanaha da administracyjnaj i kryminalnaj adkaznaści. Źmiakčalnym — pryznańnie viny. U suviazi z hetym prašu prysudzić abvinavačanaha da 4 hadoŭ pazbaŭleńnia voli z adbyvańniem pakarańnia ŭ kałonii ahulnaha režymu.
Advakat paprasiŭ sud pryznačyć pakarańnie, nie źviazanaje z pazbaŭleńniem voli.
— Tak, čałaviek svaje pohlady vykazvaŭ na niejkich mitynhach, akcyjach. Ale ŭ sudzie prahučała fraza, što jon nie budzie bolš prysutničać na takich mierapryjemstvach, budzie strymlivać svaje emocyi, a siłu budzie prymianiać tolki ŭ trenažornaj zale. Prašu dać apošni šaniec abvinavačanamu, — zajaviŭ abaronca Baranoviča.
U sudzie abvieščany pierapynak da 28 lutaha, kali Baranovič vystupić z apošnim słovam.
Čytajcie taksama: Sudziać Śviatasłava Baranoviča, jaki ŭdaryŭ milicyjanta ŭ cyvilnym, abaraniajučy ŭdzielnikaŭ «Marša niedarmajedaŭ»
Baksior, santechnik — što viadoma pra Śviatasłava Baranoviča, jaki adbivaŭ demanstrantaŭ u ahientaŭ u cyvilnym
