Фота Сяргея Гудзіліна
Абвінавачванне запытала для мінчука Святаслава Барановіча, які ўдарыў міліцыянта пасля «Маршу недармаедаў» увесну 2017 года, 4 гады пазбаўлення волі з адбываннем пакарання ў калоніі агульнага рэжыму.
У судзе Маскоўскага раёна Мінска працягваецца суд над Святаславам Барановічам, якога абвінавачваюць у гвалце ў дачыненні да супрацоўніка ўнутраных органаў. Яму пагражае абмежаванне волі на тэрмін да 5 гадоў або пазбаўленне волі на тэрмін да 6 гадоў.
Нагадаем, інцыдэнт адбыўся 15 сакавіка мінулага года пасля санкцыянаванага «Марша недармаедаў» у Мінску. Барановіч спрабаваў «адбіць» у міліцыянтаў у цывільным людзей, якіх затрымлівалі ў тралейбусе № 37 на прыпынку «Плошча Бангалор», сярод якіх былі і анархісты, якія ўдзельнічалі ў акцыі, і звычайныя пасажыры. Самога Барановіча затрымалі толькі праз паўгода — 3 кастрычніка. З тых часоў ён знаходзіўся ў СІЗА № 1 Мінска.
Падчас першага пасяджэння Барановіч прызнаў сябе вінаватым. Пацярпелы міліцыянт Арцём Паўлаў заявіў у судзе, што цяпер прэтэнзій да абвінавачанага не мае, у тым ліку маральных.
Сёння суд прыняў рашэнне абвясціць паказанні Барановіча з-за наяўнасці супярэчнасцяў.
«Барановіч паказаў, што не памятае падзеяў 15 сакавіка 2017, а таксама, дзе ён у гэты дзень знаходзіўся. У ходзе допыту 5 кастрычніка 2017 года абвінавачваны паказаў, што ў «паказаным месцы ў гэты час не прысутнічаў, напэўна, не памятаю. Удары не наносіў». У рамках допыту пазней абвінавачаны дапусціў факт свайго ўдзелу ў мерапрыемствах 15 сакавіка 2017 і нанясення сваіх удараў. Пажадаў даць паказанні і паказаць сваю пазіцыю, указаў аб прызнанні віны. Паказанні вырашыў даваць пасля змены адваката. 22 снежня 2017 года падчас допыту ў прысутнасці абаронцы ўказаў аб прызнанні віны і што ўдары супрацоўніку нанёс, бо не хацеў, каб ён затрымліваў анархістаў. Я зразумеў, што хлопец перада мной меў прыкметы міліцыянта, бо ён быў спартыўнага целаскладу, у цёмна-сіняй куртцы з капюшонам, які закрываў палову яго твару. І пасля наведвання падобных акцый і мітынгаў я навучыўся пазнаваць міліцыянтаў у цывільным», — зачытала сведчанні допытаў суддзя.
— Пацвярджаю гэтыя паказанні, — сказаў у судзе Барановіч.
У судзе пачаліся судовыя спрэчкі. Спачатку слова было дадзена дзяржабвінаваўцу Валерыю Сергіенку.
— Барановічу было прад'яўлена абвінавачванне ў тым, што ён 15 сакавіка, з 19 да 19.30 гадзін, нанёс супрацоўніку ўнутраных спраў ўдары рознымі часткамі цела. Прашу суд вынесці абвінаваўчы прысуд. Будучы дапытаным, Барановіч сваю віну цалкам прызнаў, прызнаў, што наносіў удары і ўсведамляў, што перад ім супрацоўнік унутраных спраў, ў зробленым раскайваецца, — сказала пракурор. — абцяжваючымі абставінамі прашу лічыць неаднаразовае прыцягненне абвінавачанага да адміністрацыйнай і крымінальнай адказнасці. Змякчальным — прызнанне віны. У сувязі з гэтым прашу прысудзіць абвінавачанага да 4 гадоў пазбаўлення волі з адбываннем пакарання ў калоніі агульнага рэжыму.
Адвакат папрасіў суд прызначыць пакаранне, не звязанае з пазбаўленнем волі.
— Так, чалавек свае погляды выказваў на нейкіх мітынгах, акцыях. Але ў судзе прагучала фраза, што ён не будзе больш прысутнічаць на такіх мерапрыемствах, будзе стрымліваць свае эмоцыі, а сілу будзе прымяняць толькі ў трэнажорнай зале. Прашу даць апошні шанец абвінавачанаму, — заявіў абаронца Барановіча.
У судзе абвешчаны перапынак да 28 лютага, калі Барановіч выступіць з апошнім словам.
Чытайце таксама: Судзяць Святаслава Барановіча, які ўдарыў міліцыянта ў цывільным, абараняючы ўдзельнікаў «Марша недармаедаў»
Баксёр, сантэхнік — што вядома пра Святаслава Барановіча, які адбіваў дэманстрантаў у агентаў у цывільным
