Z nastupleńniem ciemry ŭ Hrodnie ŭ dvuch internatach univiersiteta na vulicy Davatara, 27 i vulicy Praletarskaj, 16 haśnie śviatło ŭ voknach, kamiendant pa hučnaj suviazi zahadvaje ŭklučać śviatło tolki ŭ peŭnych pakojach, kab z vulicy było vidać, jak zaśviacilisia słovy «Tvoj Vybar». I kab heta pabačyła kandydatka ŭ deputaty — rektar univiersiteta Iryna Kiturka, piša «Radyjo Svaboda».
Fota «Radyjo Svaboda».
Siabra studenckaha samakiravańnia Karyna Młynoŭskaja raskazała, što akcyja była zadumanaja dziela padtrymki vybaraŭ, jakija adbyvajucca ciapier u krainie, kab na ich źviarnuli ŭvahu nia tolki studenty, a i astatnija haradžanie. A taksama dziela taho, kab padtrymać svajho rektara — Irynu Kiturku, jakaja vyłučajecca kandydatam u deputaty haradzkoha savieta.
«Adno słova — «tvoj» — było «składziena» z voknaŭ internata na vulicy Praletarskaj, a druhoje — «vybar» — na vulicy Davatara. Akcyja adbyłasia 12 lutaha. U kožnym internacie adnačasova hasili śviatło, kamiendant praz hučnuju suviaź padavaŭ kamandu — i zaharalisia tolki tyja vokny, jakija składali hetyja słovy» — raspaviadaje Młynoŭskaja.
Pavodle surazmoŭcy, akcyja mieła efekt, pakolki studentam vielmi spadabałasia. Da taho ž hetaj akcyjaj, ź jaje słoŭ, studenty padtrymali i svajho rektara Irynu Kiturku.
«Dla našaj rektarki heta byŭ siurpryz, jana nia viedała pra heta. Ale ŭ hety čas była ŭ vučebnym korpusie na vulicy Davatara i, kali ŭžo adjaždžała, to pabačyła našu akcyju. Mahčyma, i adčuła našu maralnuju padtrymku» — kaža Karyna Młynoŭskaja.
Pavodle Młynoŭskaj, akcyja zaniała kala 20 chvilin, nikomu nie pieraškodziła i spadabałasia studentam.
