Alaksandr Łukašenka abnaviŭ kiraŭnikoŭ bujnych dziaržaŭnych ŚMI.
* * *
Dyrektar BiełTA Dźmitryj Žuk staŭ hałoŭnym redaktaram «Sovietskoj Biełoruśsii» zamiest Paŭła Jakuboviča.
Žuk niekali ŭznačalvaŭ pres-słužbu Alaksandra Łukašenki. Jon syn piśmieńnika Alesia Žuka, aŭtara «Palavańnia na apošniaha žuraŭla».
Jakubovič jašče za savieckimi časami zdabyŭ sabie słavu jak fieljetanist. U 1991 hodzie jon rezka vystupiŭ suprać HKČP. A ŭ 1996 hodzie niečakana dla mnohich padtrymaŭ Łukašenku.
* * *
Staršynioj Biełteleradyjokampanii zamiest Hienadzia Davydźki pryznačany Ivan Ejsmant.
Ejsmant pracavaŭ namieśnikam staršyni Biełteleradyjokampanii. Jon — muž Natalli Ejsmant, pres-sakratarki Alaksandra Łukašenki. A taksama brat spartyŭnaj teležurnalistki Hanny Ejsmant.
Cikava, što jon skončyŭ Akademiju milicyi. Siamja pachodzić z Hrodzienskaha rajona, biełaruska-polskaha prymiežža.
Davydźka ž sfakusirujecca na pracy ŭ «Biełaj Rusi».
* * *
Pieršy namieśnik ministra infarmacyi Ihar Łucki pryznačany hiendyrektaram telekanała STB. Raniej hetu pasadu zajmaŭ Juryj Kazijatka.
* * *
Łukašenka, zakranajučy budučyniu Paŭła Jakuboviča zaznačyŭ, što «stracić jaho nie pavinny». «U jaho vialiki kavałak pracy (jon abrany staršynioj hramadskaha savieta pry MUS). I hetuju rabotu treba ŭzmacnić. Heta niešta padobna kantrolu za pravaachoŭnymi orhanami. Pahatoŭ, što nie ja inicyjavaŭ hety hramadski saviet pry MUS, a sami milicyjanty. Małajcy», - adznačyŭ kiraŭnik dziaržavy.
«U Paŭła Izotaviča pracy chopić. Ja dumaju, jon nie sydzie ad svajoj prafiesijnaj dziejnaści. I Davydźka, i jon, jak ja ŭžo kazaŭ, pavinny ŭ ŚMI pracavać i supracoŭničać ź imi. U jakoj formie — treba vyznačycca, - zajaviŭ Łukašenka.
— što tyčycca Davydźki, ja dumaju, jaho status treba pavyšać i razhledzieć pytańnie, unieści prapanovu, ab jaho nakiravańni ŭ Saviet Respubliki sienataram. Heta ŭzmocnić jaho pazicyi. Ja nie vyklučaju, što i Pavieł Jakubovič zmoža tam pracavać. Nam vielmi patrebnyja daśviedčanyja ludzi.
Prytym ludzi, jakija prajšli hety pierałomny pieryjad ŭ našaj historyi - darohu ad Savieckaha Sajuza da niezaležnaj Biełarusi. Ludzi, pravilna razumiejuć hety pieryjad i tyja pieramieny, jakija adbylisia».
president.gov.by
***
«Zadača staić adna — sumlenna, spraviadliva pakazvać toje, jak žyvie kraina, nie julić i dać ludziam maksimalna abjektyŭnuju infarmacyju», — zajaviŭ Dźmitryj Žuk pradstaŭnikam ŚMI.
Dla hetaha, pavodle jaho słoŭ, nieabchodna vykonvać absalutna prostyja rečy: słuchać i čuć, bačyć i, samaje hałoŭnaje, uličvać intaresy hramadzian. «Rabić hazietu, redaktaram jakoj ja pryznačany, mienavita ŭ intaresach jaje čytačoŭ, heta značyć biełarusaŭ», — padkreśliŭ jon.
Čytajcie taksama:
Piać faktaŭ pra novaha staršyniu Biełteleradyjokampanii Ivana Ejsmanta
Piać faktaŭ pra pres-sakratarku Łukašenki Natallu Ejsmant — šmat FOTA
Davydźka paśla adstaŭki: Ci mnie soramna? Hanarusia, što zmahaŭsia za stabilnaść
Jakubovič: Ja 24 hady ŭznačalvaŭ samuju bujnuju redakcyju, i bolš u mianie niama sił rabić heta
***
Na telehram-kanał «Našaj Nivy» možna padpisacca tut.
