Pieršyja dni marazoŭ stvaryli iluziju, što lod na rekach i aziorach užo tryvały. Ale heta nie tak.
Ilustracyjnaje fota.
Ratavalniki nahadvajuć, što vychad na lod kateharyčna zabaronieny! Zachavajcie svajo žyćcio i papiaredźcie znajomych i svajakoŭ.
Trahičnyja naviny prychodziać z usioj krainy.
Na Piatrovickim vadaschoviščy ŭ Smalavickim rajonie 13 studzienia pad lod pravalilisia dva rybaki. Adnamu dapamahli vybracca ludzi, ale druhi, 31-hadovy mužčyna, zahinuŭ.
Patanuŭ čałaviek i ŭ Rahačoŭskim rajonie. Miascovyja žychary 12 studzienia kala 14.30 pabačyli na voziery la pasiołka Bielick rovar, ale biez haspadara. Na miesca vyjechali vadałazy, milicyja. Nieŭzabavie na pavierchni vady byŭ znojdzieny trup mužčyny. Zahinuły — 62-hadovy mužčyna.
A ŭ Mazyrskim rajonie pravaliŭsia pad lod i patanuŭ 13-hadovy chłopčyk. U pasiołku Kryničny školnik hulaŭ razam ź siabram i vyrašyŭ vyprabavać taŭščyniu lodu. Nastupiŭ na jaho, zrabiŭ niekalki krokaŭ — i pravaliŭsia. Siabra sprabavaŭ dastać jaho, ale nie zdoleŭ.
Što rabić, kali vy pravalilisia pad lod?
1. Napaŭzajcie na lod z šyroka raźviedzienymi rukami.
2. Kateharyčna zabaraniajecca ŭstavać na nohi. Heta pavialičvaje ryzyku znoŭ pravalicca.
3. Ležačy na śpinie ci na žyvacie, prasoŭvajcie ŭ bok bieraha, adnačasova kličcie na dapamohu.
Što rabić, kali vy stali vidavočcam zdareńnia?
1. Acanicie, ci zmožacie vy akazać dapamohu samastojna.
2. Padpaŭzicie da miesca prałomu lodu za 3-4 mietry.
3. Padsuńcie paciarpiełamu viaroŭku, leśvicu, došku, kijok.
4. Kali ratavalnikaŭ niekalki, utvarycie łancužok, trymajučy adzin adnaho za nohi.
5. Dziejničajcie rašuča, ale aściarožna.
6. Raźviadzicie vohnišča, sahrejcie paciarpiełaha.
U vypadku nieabchodnaści nieadkładna telefanujcie 101 ci 112.
