Siabra Sojma Partyi BNF Pavieł Batujeŭ raskazaŭ, što niečakana sutyknuŭsia ź lohkimi prablemami na pracy.
Pavieł Batujeŭ z žonkaj na źjeździe BNF. Fota facebook.com.
Pavieł daŭni siabra BNF i TBM. Piać hadoŭ jon pražyŭ na poŭnačy Rasii, pra što padrabiazna raskazaŭ u vialikim intervju dla «NN». Sioleta jon viarnuŭsia ŭ rodny Salihorsk, uładkavaŭsia na pracu prarabam u pradpryjemstva «Liftservis».
«Raz na miesiac ja pryjazdžaju ŭ Minsk, kab padać spravazdačy ŭ hałoŭny ofis. Dyk na hety raz mianie spynili jašče ŭ kalidory pytańniem: «Vy toj samy Batujeŭ?» Ja padumaŭ, što moža bačyli majo intervju pa Jamału. Adnak akazałasia, što načalstvu pryjšli dźvie ananimki adnosna mianie.
Potym heta samaje paćvierdziŭ hałoŭny inžynier, ale nie daŭ pahladzieć hetyja aninimki. Jany napisanyja ź niejkich «lipavych» akaŭntaŭ, biez zvarotnaj suviazi. Načalnik skazaŭ, što pa pracy da mianie pytańniaŭ niama, a čym ja zajmajusia ŭ volny čas — heta nie jahonaja sprava.
Abureńnie ananimnaha aŭtara vyklikała, što ja siabra «siejma» BNF, pisaŭ niešta pra sustreču z pasłom Francyi, jaki pryjazdžaŭ u Salihorsk dzieści miesiac tamu. Skinuli načalstvu ŭsie maje profili ŭ sacyjalnych sietkach — fejsbuku, ukantakcie, adnakłaśnikach», — raskazvaje Batujeŭ.
Jak kaža mužčyna, ciapier jon absłuhoŭvaje kala 40% usich liftaŭ Salihorska. Usiaho ŭ jahonym padparadkavańni 348 liftaŭ. Pa praviłach karystańnia liftaŭ proźvišča Batujeva i jahony telefon prapisany, jak u samich hetych liftach, hetak i na pieršym paviersie.
«Mo niechta sa starych niepryjacielaŭ pabačyŭ heta, tamu vyrašyŭ naškodzić», — raskazvaje Pavieł.
