Na mižnarodnym servisie pa braniravańni žylla Booking možna znajści samyja darahija prapanovy dla Minska. Čym jany admietnyja?
Najdaražejšy varyjant — haściavy vip-dom u Raŭbičach.
Płošča doma — 700 kvadratnych mietraŭ. Prapanujuć spa, trenažornuju zału, basiejn.
U domie 6 spalniaŭ. Učastak na bierazie Raŭbickaha vadaschovišča ŭklučaje navat kavałak plažu. Płošča ŭčastka — bolš za 20 sotak.
Za noč u takim domie daviadziecca zapłacić amal $1700 za sutki. Pryčym za śniadanak treba budzie dapłacić asobna!
Nastupny varyjant — viła «Kamiennaja horka».
Budynak znachodzicca za MKAD. Naviedvalnikam prapanujuć trenažornuju zału, saŭnu, tureckuju baniu chamam i kryty basiejn.
U domie try spalni, piać sanvuzłoŭ, kaskadny vadaspad.
Ahulnaja płošča doma — 350 kvadratnych mietraŭ, učastka — 15 sotak.
Abyjdziecca adpačynak amal u $1500 za sutki. Kali braniravać praź biełaruski sajt, košty nižejšyja — $1100. Čym daŭžejšy termin arendy, tym vychodzić tańniej.
Prykładna takija ž košty i na sutki ŭ vile «Tarasava».
Tam padarožnikam prapanujuć spynicca ŭ domie z toj ža płoščaj (350 mietraŭ) i na takim ža ŭčastku (15 sotak). Jość basiejn.
Znachodzicca žyllo ŭ pasiołku Tarasava, taksama za MKADam.
Hetyja viły papularnyja nie tolki siarod turystaŭ, ale i siarod biełaruskich sielebryci. Fotki svajho adpačynku adtul vykładvała, naprykład, Valeryja Maćviejenka — dziaŭčyna litoŭskaha futbalista Fiodara Čarnych, jaki ciapier hulaje ŭ Polščy, a raniej vystupaŭ za biełaruskija kłuby «Dniepr» i «Naftan».
Dzielicca fotazdymkami adpačynku na viłłach i televiadučaja i madel Kacia Koba.
Baviła tam čas i madel, uradženka Bresta Volha Hryboŭskaja.
Biznesam pa arendzie katedžaŭ z kaśmičnymi cenami vałodaje minčanka Natalla Kałdžy.
Akramia troch katedžaŭ, Kałdžy zdaje jašče i kvateru ŭ domie Čyža, płoščaj 150 mietraŭ. Ale jana kaštuje tańniej — «usiaho» $500 za sutki.
Pa niepaćvierdžanaj infarmacyi, muž Natalli — turecki biznesmien.
Raskazvać «Našaj Nivie» pra paśpiachovaść svajho biznesu Natalla Kałdžy nie zachacieła.
