Pavodle infarmacyi Jeŭraradyjo, na adzior zachvareŭ małady čałaviek, jaki na minułym tydni viarnuŭsia z turystyčnaj pajezdki ŭ Indanieziju. U ciapierašni čas jon špitalizavany. Sanepidemstancyja horada Minska adpracoŭvaje kantakty nieščaślivaha turysta.
Adzior — śmiarotnaja chvaroba. Jana źjaŭlajecca adnoj z samych zaraznych virusnych infiekcyj, krynicaj jakoj źjaŭlajecca chvory čałaviek. Pieradača infiekcyi ažyćciaŭlajecca pavietrana-kropielnym šlacham. Jak praviła, chvaroba praciakaje ciažka: z vysokaj tempieraturaj, kašlem, šyrokim sypam i kanjuktyvitam.
Ličycca, što ŭ Biełarusi adzior pieramožany. U vieraśni 2016 hoda naša kraina atrymała siertyfikaty Suśvietnaj arhanizacyi achovy zdaroŭja ab dakumientalna zaśviedčanaj eliminacyi [źniknieńni vypadkaŭ zachvorvańnia na vialikaj terytoryi. — Jeŭraradyjo] adru i krasnuchi. Tym nie mienš čas ad času ŭ Biełarusi adznačajucca adzinkavyja vypadki zachvorvańnia na adzior.
U 2016 hodzie takich vypadkaŭ było zafiksavana 133, adnak tolki dziesiać chvorych byli hramadzianami našaj krainy. U červieni 2017 hoda miedyki davali spravazdaču, što za 5 miesiacaŭ zafiksavali tolki adzin vypadak adzioru.
Adziny sposab abarony ad adzioru — vakcynacyja. Pa stanie na siaredzinu lipienia 2017 hoda ŭ Biełarusi vakcynacyju suprać adru prajšło 98% nasielnictva.
