Fiederalnaja mytnaja słužba Rasii raskryła najbujniejšuju sietku pastaŭščykoŭ sankcyjnaj pradukcyi. U jaje ŭvachodziać 29 kampanij, zarehistravanych u pieryjad z 2014 hoda, a zasnavalnikami ŭ asnoŭnym źjaŭlajucca hramadzianie Biełarusi. Pra heta paviedamlaje RBK sa spasyłkaj na krynicy, «blizkija da da FMS».
Śpis składaŭsia FMS nastupnym čynam, raspaviała krynica RBK. Pierš za ŭsio, pad padazreńnie trapili kampanii, jakija, zhodna z pašpartami ździełak udzielnika źniešnieekanamičnaj dziejnaści, mieli kantrakty z adnym z troch biełaruskich pastaŭščykoŭ — respublikanskim unitarnym pradpryjemstvam (RUP) «Biełmytniaservis», TAA «Haz Vienčure» abo TAA «Hłobałkastam», što śpiecyjalizujucca na ŭvozie ŭ Biełaruś pradukcyi, jakaja ŭ Rasii zabaronienaja.
FMS taksama pravieryła ŭ hetych troch kampanij dekłaracyi ab adpaviednaści na pradukcyju, jakaja pastaŭlajecca (jany rehistrujucca Rasakredytacyjaj i śviedčać jakaść pradukcyi, jakaja pastaŭlajecca). Akazałasia, što častka dekłaracyj była vydadzienaja rasijskimi akredytavanymi łabaratoryjami na sankcyjnyja pradukty. «Kab atrymać hety dakumient, kampanija pavinna była zavieźci ŭ krainu ŭzory pradukcyi, ale heta nielha zrabić lehalna, značyć, dakumient nie dziejničaje», — raspaviadaje surazmoŭca RBK.
«Sumnieŭnyja» dekłaracyi (u jakich ukazanyja ŭ tym liku sankcyjnyja tavary) mytnia vyjaviła i ŭ rasijskich kampanij, jakija supracoŭničali ź biełaruskaj «trojkaj». «Samo pa sabie heta nie parušeńnie, ale jaho ŭskosnaja prykmieta, — kaža surazmoŭca RBK. — Navošta atrymlivać dakumient na tavar, jaki nielha ŭvozić?»
Pavodle danych FMS, z pačatku 2015 hoda 29 kampanij, jakija trapili ŭ śpis, pieraviali trom biełaruskim kontrahientam tolki za płodaaharodninnuju pradukcyju sumarna $125,7 młn.
